«Bokstan álem chempıonaty. Almaty 2013» eskertkish monetasy shyǵaryldy
ALMATY. 8 qazan. QazAqparat - QR Ulttyq Banki 4 qazannan bastap nomınaly 100 teńgelik «Bokstan álem chempıonaty. Almaty 2013» eskertkish kúmis monetasynyń aınalysqa shyǵarylǵanyn málim etti.
Moneta 925 synamdy kúmisten jasalǵan, massasy - 31,1 gramm, dıametri - 38,61 mm, daıyndaý sapasy - «proof», taralymy - 3 myń dana. Onyń bet jaǵyndaǵy ortalyq bóliginde Qazaqstan eltańbasy beınelengen. Monetanyń bet jáne syrt jaǵyndaǵy beıneler men jazýlar jáne qyry bederli. «100 TEŃGE», «QAZAQSTAN ULTTYQ BANKІ» jáne daıyndalǵan metaldy, onyń synamy men massasyn bildiretin «Ag 925 31,1g» degen jazý, soǵylǵan jylyn bildiretin «2013» degen san ornalasqan jáne shyǵyńqy jıek bar. Syrt jaǵynyń ortalyq bóliginde jarys kezindegi rıngtegi boksshylar beınelengen. Sol jaq bóliginde Halyqaralyq boks qaýymdastyǵynyń logotıpi jáne bokstan álem chempıonatynyń ótkiziletin orny men jylyn bildiretin «ALMATY 2013» degen jazý ornalasqan. Tómengi bóliginde aǵylshyn tilinde «AIBA WORLD BOXING CHAMPIONSHIPS» degen jazý bar.
