Bokstan álem chempıonaty: Abylaıhan Júsipov qola medal aldy

NUR-SULTAN. QazAqparat - Qazaqstandyq Abylaıhan Júsipov Reseıdiń Ekaterınbýrg qalasynda ótip jatqan bokstan álem chempıonatynda Qazaqstan qorjynyna tórtinshi qola medal saldy, dep habarlaıdy QazAqparat tilshisi.

Abylaıhan Júsipov 69 kelide reseılik boksshy Andreı Zamkovoımen qolǵap túıistirdi. Búgingi jekpe-jekte qos qarsylas tartysty báseke kórsetti. Bir-birine jumsaǵan soqqylary dál tıip jatty. Abylaıhan ózinen on jas úlken reseılik bylǵary qolǵap sheberiniń osal tusyn tabýǵa barynsha tyrysty. Degenmen tóreshiler jeńisti reseılik boksshyǵa berdi.

Abylaıhan Júsipov 1997 jyly Qaraǵandy oblysynda dúnıege kelgen. Buǵan deıin 2017 jyly álem chempıonatynda qola, Azııa chempıonatynda kúmis júldeger atanǵan.

Ol 69 kelide bıylǵy álem chempıonatyn 1/16 fınaldyq satysynan bastap, onda taılandtyq Výttıchaı Masýhty tize búktirdi. Odan keıin 1/8 fınalda germanııalyq Nık Býrdy jeńdi. Shırek fınalda Domınıkan Respýblıkasynan kelgen Emılıano Polankodan basym tústi.

Búgingi qarsylasy Andreı Zamkovoı - Reseıdiń 32 jastaǵy tájirıbeli boksshysynyń biri. Ol 2012 jyly Olımpıadada qola alsa, 2009 jyly álem chempıonatynda qola júldege qol sozdy.

Buǵan deıin búgin qazaqstandyq úsh boksshy qarsylastaryna ese jiberdi. Nátıjesinde Qazaqstan qorjynyna úsh qola medal tústi.