Bokstan álem chempıonaty: Ábilhan Amanqul 4/1 fınalǵa joldama aldy
ASTANA. QazAqparat - Germanııanyń Gambýrg qalasynda ótip jatqan bokstan Álem chempıonatynda óziniń ekinshi jekpe-jegin 75 kelige deıingi salmaq dárejesindegi Ábilhan Amanqul ótkizdi, dep habarlaıdy QazAqparat.
Qazaqstandyq sportshy qarsylasy - nemis Sılvıo Shıerleni aıqyn basymdyqpen jeńdi, esep - 5:0.
29 tamyz kúni ótetin shırek fınaldyq kezdesýde Ábilhan Amanqul endi kýbalyq Arlen Lopespen aıqasady.
Eske salaıyq, buǵan deıin taǵy eki sportshymyz Jomart Erjan (49 keli) men Qaırat Eralıev (56 keli) Álem chempıonatyndaǵy ekinshi jekpe-jekterin sátti ótkizip, shırek fınalǵa joldama alǵan bolatyn. 29 tamyzda Jomart reseılik Vasılıı Egorovpen, Qaırat nemis Omar El-Hagpen qolǵap túıistiredi.
26 tamyz kúni týrnırdegi jarysyn Azamat Isaqulov (52 keli) pen Ádilet Qurmetov (60 keli) aıaqtaǵan bolatyn.
Aıta keteıik, 25 tamyzda bastalǵan Bokstan álem chempıonaty toǵyz kúnge jalǵasyp, 2 qyrkúıek kúni márege jetedi. Qazaqstan quramasy barlyq 10 salmaq dárejesinde synǵa túsetin bolady. Olar - 49 keli salmaqta Erjan Jomart, 52 keli salmaqta Azamat Isaqulov, 56 keli salmaqta Qaırat Eralıev, 60 kelide Ádilet Qurmetov, 64 kelide Bekdáýlet Ibragımov, 69 kelide Abylaıhan Júsipov, 75 kelide Ábilhan Amanqul, 81 kelide Erik Áljanov, 91 kelide Vasılıı Levıt jáne asa aýyr salmaqta Qamshybek Qońqabaev.
Baıraqty dodada álemniń 85 elinen 280 boksshy baq synaýda.
