Bokstan álem chempıonaty: 8 otandasymyz fınalǵa shyqty
QR Boks federatsııasy baspasóz qyzmetiniń habarlaýynsha, búgin álem birinshiliginiń jartylaı fınaldyq kezdesýleri óz máresine jetti. Qazaqstannan úsh boksshy qola medalǵa qol jetkizip, 8-i fınalǵa ótti.
Atap aıtar bolsaq, Mahmud Sabyrhan (49 kg), Jansaıa Ábdiraıymova (51 kg) men Ánel Qudaıbergen (48 kg) qola medal aldy.
Azııa chempıony Mahmud Sabyrhan (49 kg) jartylaı fınalda pýertorıkalyq Jan Pol Rıvera Pıtstsarodan utyldy. Jansaıa Ábdiraıymova (51 kg) amerıkalyq Heven Garsııadan, Ánel Qudaıbergen (48 kg) úndistandyq Nıtýden aılasyn asyra almady.
Al fınalǵa shyqqan 8 jerlesimiz týraly aıtsaq, olar - Ermahan Jaqpekov (69 kg), Nurbek Oralbaı (75 kg), Aıbek Oralbaı (91 kg), Damır Toıbaı (91+ kg), Saǵyndyq Toǵambaı (81 kg), Gúzál Sadyqova (81 kg), Dına Islambekova (81+ kg) jáne Aızada Іslámǵalı (54 kg).
Azııa birinshiliginiń jeńimpazy Ermahan Jaqpekov (69 kg) jartylaı fınalda taılyq Pırapat Easýngnoenmen kezdesip, birinshi raýndta-aq qarsylasyn nokaýtqa jiberdi. Endi ol fınalda Reseı men Eýropa chempıony Jambolat Bıjamovpen kezdesedi.
Azııa chempıonatynyń kúmis júldegeri Nurbek Oralbaı (75 kg) ózbek Navo Tamazovty utty. Endi ol fınalda reseılik Danıl Teterevpen bylǵary qolǵap túıistiredi. Aıbek Oralbaı (91 kg) aljırlyq Amın Hasıda Mohammedti jeńdi. Fınalda reseılik Igor Fedorovpen kezdesedi.
Azııa chempıony Gúzál Sadyqova (81 kg) ýkraınalyq Karolına Mahnony tize búktirdi. Ol da aqtyq kezdesýde reseılik Anastasııa Rybakpen shyǵady. Aızada Іslámǵalı (54 kg) Taılandtan kelgen Phonapp Lapandy utty. Fınalda AQSh ókili Aııana Verdýskomen baǵyn synaıdy.
Azııa chempıondary Damır Toıbaı (91+ kg) men Saǵyndyq Toǵambaıdyń (81 kg) qarsylastary jarys jolynan óz erikterimen shyǵyp qalǵandyqtan, ekeýi fınalǵa avtomatty túrde shyǵyp otyr. Olar reseılik boksshylarmen kezdesedi. Azııa chempıony Dına Islambekova (81+ kg) fınalda ýkraınalyq Marııa Lovchınskomen jekpe-jek ótkizedi. Aqtyq kezdesýler 30-31 tamyz aralyǵynda ótedi.
Foto: kfb.kz