Bokstan álem chempıonatynda jetistikke jetken áıelder quramasy Almatyǵa oraldy
ALMATY. KAZINFORM — Lıverpýlde ótken bokstan álem chempıonatynan oralǵan Qazaqstannyń áıelder quramasyn Almaty áýejaıynda saltanatty túrde qarsy aldy.
15-nen 16 qyrkúıekke qaraǵan túni Almaty áýejaıynda erekshe atmosfera ornady. Bul ýaqytta Lıverpýlde ótken bokstan álem chempıonatynan oralǵan Qazaqstannyń áıelder quramasyn kútip alý sharasy ótti. Kútip alýshylar qatarynda Kazinform tilshisi de bolyp, el maqtanyshtarymen suhbattasty.
Qazaqstannyń áıelder quramasy 2025 jylǵy bokstan álem chempıonatynda medaldar sany boıynsha jalpykomandalyq esepte birinshi oryndy ıelendi. Sonymen qatar eldiń absolıýttik jeńisine zor úles qosty — 7 altyn, 1 kúmis jáne 2 qola medal. Qurama túngi ýaqytta ushyp kelse de, olardy qarsy alýǵa tek týystary men jaqyndary ǵana emes, kóptegen jankúıer de kelgen. Saltanatty atmosferany áskerı orkestr men dombyrashylar jandandyra tústi.
Alýa Balqybekova, Nazym Qyzaıbaı, Natalıa Bogdanova, Aıda Ábikenova, Vıktorııa Grafeeva jáne Eldana Tálipova jalpy zalǵa shyqqan boıda dástúr boıynsha baýyrsaq pen qymyzdan dám tatty. Keıin olar jaqyndarymen qaýyshty.
26 jastaǵy álem chempıony Natalıa Bogdanova Kazinform tilshisine bergen suhbatynda mundaı keremet qarsy alýdy kútpegenin aıtty.
— Árıne, bizdi qoldaıtyn, bizge senetin otandastarymyzdyń baryna qýanyshtymyz. Biz sol úshin jattyǵyp, elimiz úshin jarysqa shyǵamyz. Chempıonattaǵy eń qıyn jekpe-jek? Jergilikti sportshymen (aǵylshynmen — avt.) bolǵan kezdesý. Onyń óz elinde ekenin jaqsy túsindik, men bar kúshimdi salyp, fınalǵa ótýge tyrystym. Jáne ol meniń qolymnan keldi, — dedi Bogdanova.
Onyń aıtýynsha, aldaǵy josparlar — aldymen demalý, keıin jańa týrnırlerge daıyndalý.
Álem chempıonatynyń qola júldegeri 24 jastaǵy Vıktorııa Grafeeva áýejaıdaǵy qarsy alý óte áserli bolǵanyn aıtty.
— Qanshama adam kelip qoldady — týystar, jankúıerler, barlyǵy quttyqtap, qoldaý bildirdi. Biz, sportshylar, eń aldymen elimizdiń abyroıy úshin óner kórsetemiz. Halyqtyń osyndaı qoldaýyn kórý — úlken qýanysh. Men qola júldeger atansam da, halyqtyń qoldaýy jiger beredi. Kelesi jarystarda budan da joǵary medal alýǵa tyrysamyn, — dedi Grafeeva.
Onyń aıtýynsha, eń qıyn jekpe-jek alǵashqysy bolǵan, sebebi ol kezde qarsylasy óte tájirıbeli sportshy bolǵan jáne ózi sál sýyq tıgizip alǵan eken.
— Biraq týrnırdiń sońyna qaraı qarqyn alyp, jeńildeý boldy. Jartylaı fınalda tóreshiler jeńisti qarsylasqa berdi, biraq men óz jekpe-jegimde jeńildim dep sanamaımyn. Tóreshilerdiń sheshimi solaı bolǵanymen, endi keleside olarda esh kúmán týmaýy úshin barymdy salý kerek, — dep túıindedi Grafeeva.
Quramanyń eń ataqty sportshysy, úsh dúrkin álem chempıony, 32 jastaǵy Nazym Qyzaıbaı Lıverpýl-2025 jarysynda kúmis júlde ıelendi. Alaıda bul nátıjeden onyń kóńili túspeı, kerisinshe, alǵa jeteleıdi eken.
— Meniń basty maqsatym — 2028 jylǵy Olımpıadada altyn medal ıelený. Múmkin, salmaq dárejesin aýystyrý kerek bolar. Men oǵan daıynmyn, bastysy — maqsatqa jetý, — dedi Nazym Qyzaıbaı.
Jankúıerlermen sýretke túskennen keıin, qyzdar jaqyndarymen qaıta qaýyshýǵa múmkindik aldy.
Alda — qysqa demalys pen otbasymen ótkizetin kópten kútken ýaqyt. Odan keıin kúsh jınaǵan soń, sportshylar qaıta jattyǵýǵa kirisip, otandastaryn jarqyn jeńisterimen taǵy da qýantýǵa attanady.
Eske salaıyq, Qazaqstan bokstyń otanynda — Anglııada ótken tarıhı álem chempıonatynda zor tabysqa qol jetkizdi. Bul jeńistiń otandyq jáne álemdik sport úshin mańyzy erekshe.