Bokstan álem chempıonatynda Sáken Bıbosynov 1/2 fınalǵa joldama aldy

ASTANA. KAZINFORM - Halyqaralyq boks assotsıatsııasy (IBA) aıasynda Dýbaıda (BAÁ) ótip jatqan álem chempıonatynda el quramasynan Sáken Bıbosynov (54 keli) jartylaı fınalǵa shyqty.

Qazaqstandyq bylǵary qolǵap sheberi bul joly zambııalyq Mýengo Mýalemen sharshy alańǵa shyqty. Úsh raýndqa sozylǵan jekpe-jekte tóreshiler sheshimimen ol qarsylasyn 5:0 esebimen jeńip, jarysty jalǵastyrýǵa múmkindik aldy.

Aıta ketsek, budan buryn otandasymyz Fakı Issa Fakı (Tanzanııa), Katego Keorapetse (Botsvana) syndy qarsylastaryn qapy qaldyrdy.

Sáken Bıbosynov — ulttyq qurama sapyndaǵy tájirıbeli boksshynyń biri. 1992 jyly dúnıege kelgen bylǵary qolǵap sheberi 2020 jyly Tokıo Olımpıadasynda qola alsa, álem chempıonatynda 2021 jyly — altyn, 2019 jyly — qola medalǵa qol jetkizdi.

Sondaı-aq Azııa chempıonatynda kúmis (2022) jáne qola (2021) júldeger atandy. 

Endi el quramasynan Danııal Sábıt (51 keli), Orazbek Asylqulov (57 keli), Serik Temirjanov (60 keli), Ertýǵan Zeınýllınov (63,5 keli), Sanatálı Tóltaev (67 keli), Abylaıhan Júsipov (71 keli), Sabyrjan Aqqalyqov (75 keli) jáne Nýrlan Saparbaı (92 keliden joǵary) sharshy alańǵa shyǵady.

Eske salsaq, budan buryn qazaqstandyq Temirtas Júsipov (48 keli) jartylaı fınalǵa alǵashqy joldamany qaltaǵa basty. 

Aıta ketsek, álem chempıonaty 1/8 fınalynda Erasyl Jaqpekov (80 keli), Dáýlet Tólemisov (86 keli), Nýrmagamed ıÝsýpov (92 keli) qarsylastaryna ese jiberdi.

IBA týrnıri 3-13 jeltoqsan aralyǵynda Dýbaıda uıymdastyrylady. Bul básekede 13 salmaq dárejesi belgilengen, al júlde qory óte joǵary: chempıondar — 300 myń dollar, kúmis júldegerler — 150 myń dollar, qola júldegerler — 75 myń dollar, al shırek fınalıster 10 myń dollar alady.