Bokstan álem chempıonatynda Karına Ibragımova jarys jolynan shyǵyp qaldy

ASTANA. KAZINFORM - Anglııanyń Lıverpýl qalasynda World Boxing aıasynda ótip jatqan álem chempıonatynda Qazaqstan quramasynan Karına Ibragımova (57 keli) jarys jolynan shyǵyp qaldy.

Otandasymyz shırek fınalda polshalyq Djýlııa Sheremetamen sheberlik baıqasty.

Kezdesý barysynda qarsylastar bir-birine kóbirek soqqy jumsaýǵa tyrysty. Nátıjesinde jeńis polshalyq boksshyǵa berildi.

Qazaqstandyq bylǵary qolǵap sheberiniń qarsylasy da ońaı bolǵan joq. 2024 jyly Parıj Olımpıadasynda kúmis júldeger atanǵan edi.

Karına Ibragımova 1996 jyly dúnıege kelgen. 2023 jyly álem chempıonatynda kúmis júldeger atansa, 2018, 2022 jyly qola júldege qol sozdy.

Al 2022 jyly Azııa chempıony atandy.

Búgin el quramasynan Alýa Balqybekova (51 keli), Mahmýd Sabyrhan (55 keli), Tórehan Sabyrhan (70 keli), Vıktorııa Grafeeva (60 keli), Eldana Talıpova (80 keliden joǵary) jartylaı fınalǵa shyqsa, Nurbek Oralbaı (80 keli) men Saǵyndyq Toǵambaı (90 keli) jarys jolyn aıaqtady.

Endi el quramasynan Aıda Ábikeeva (65 keli), Gúlsaıa Erjan (80 keli), Bıbarys Jeksen (65 keli), Aıbek Oralbaı (90 keliden joǵary) sharshy alańǵa shyǵady.