Bokstan álem chempıonatynda Danııal Sábıt qarsylasyn aıqyn basymdyqpen jeńdi

ASTANA. KAZINFORM — Halyqaralyq boks assotsıatsııasy (IBA) aıasynda ótip jatqan álem chempıonatynda búgin, 6 jeltoqsanda el quramasynan Danııal Sábıt (51 keli) jarysty sátti bastady. 

Birikken Arab Ámirliginiń Dýbaı qalasynda ótip jatqan dúbirli dodada otandasymyz kenııalyq Kelvın Maınamen sharshy alańǵa shyqty.

Otandasymyz tóreshiler sheshimimen qarsylasyn 5:0 esebimen tize búktirdi.

Aıta ketsek, budan buryn Sáken Bıbosynov (54 keli) botsvanalyq Katego Keorapetseniń osal tusyn tapty.

Sondaı-aq búgin el quramasynan Sabyrjan Aqqalyqov (75 keli) Seıshel araldarynan kelgen Djoshýa Aaron Kýzındi ekinshi raýndta nokaýtqa jiberip, jarysty jalǵastyrýǵa múmkindik aldy.

Endi el quramasynan sońǵy jekpe-jekti Serik Temirjanov (60 keli) mońǵolııalyq Erdenebatyn Tsendbaatarǵa qarsy ótkizedi.

Aıta ketsek, qazirge deıin otandastarymyz arasynan Sanatáli Tóltaev (67 keli), Erasyl Jaqpekov (80 keli), Dáýlet Tólemisov (86 keli), Nýrmagamed ıÝsýpov (92 keli) jarysty jalǵastyrýǵa múmkindik aldy. 

IBA týrnıri 3-13 jeltoqsan aralyǵynda Dýbaıda uıymdastyrylady. Bul básekede 13 salmaq dárejesi belgilengen, al júlde qory óte joǵary: chempıondar — 300 myń dollar, kúmis júldegerler — 150 myń dollar, qola júldegerler — 75 myń dollar, al shırek fınalıster 10 myń dollar alady.