Bokstan ÁCh: Jaına Shekerbekova men Valentına Halzova 1/4 fınalǵa joldama aldy

ASTANA. QazAqparat - Úndistannyń Nıý-Delı qalasynda bokstan áıelder arasynda ótip jatqan álem chempıonatynda Jaına Shekerbekova men Valentına Halzova 1/4 fınalǵa joldama aldy, dep habarlaıdy QazAqparat tilshisi.

Jaına Shekerbekova 54 kelige deıingi salmaqta ózbekstandyq Nıgına Ýktamovamen judyryqtasty.

Jaına álemdik dodalarda olja salyp júrgen tájirıbeli boksshy bolsa, qarsylasy da osal emes. Ol - jastar arasynda álem chempıony.

Tartysty ótken jekpe-jek sońynda Jaına nokdaýn alyp qalǵanymen, jeńis basym daýyspen qazaqstandyqqa berildi.

Álem chempıony Valentına Halzova 75 kelige deıingi salmaqta venesýelalyq Marıelıs Irısany aıqyn basymdylyqpen jeńdi.

Osylaısha, álem birinshiliginde 12 qazaqstandyq boksshynyń 10-y jarysty jalǵastyrýda.

Eske sala keteıik, Mádına Nurshaevanyń shırek fınalǵa shyqqanyn jazǵan bolatynbyz.