Bokstan ÁCh: Taǵy bir qazaqstandyq júlde aldy

NUR-SULTAN. QazAqparat – Polshanyń Keltse qalasynda ótip jatqan jastar arasyndaǵy álem chempıonatynda qazaqstandyq Dana Dıdaı kúmis júldeger atandy, dep habarlaıdy QazAqparat tilshisi.

D.Dıdaı 75 kg salmaqta sońǵy básekede úndistandyq Sanamacha Chaný Tokchommen judyryqtasty.

Óte tartysty órbigen jekpe-jekte jeńis tóreshilerdiń sheshimimen (3:2) úndilik boksshyǵa berildi.

Dana osy birinshilik barysynda ádiletsizdiktiń qurbany bolyp kete jazdady. Onyń majarstandyq Boglarka Vargamen jekpe-jeginde tóreshiler jeńisti áýeli qarsylasyna bergen edi. Degenmen qazaqstandyqtar narazylyq bergennen keıin sheshim qaıta qaralyp, ádildik saltanat qurdy.

Osylaısha qazaqstandyq qyzdar bul chempıonatta eki kúmis, úsh qola medalǵa ıe boldy.

Eske sala keteıik, budan buryn úsh qazaqstandyq boıjetken Jasmın Qızzatova, Ásel Saǵatova jáne Eldana Tálipova qola júldeger atanǵan bolatyn.

Sondaı-aq Juldyz Shaıahmetova kúmis júldeger atandy.