BOKSTAN ÁCh: Taǵy bir qazaqstandyq I.Dychko kúmis júlde ıelendi
ASTANA. QazAqparat - Dohada bokstan márege jetken Álem chempıonatynyń aqtyq shaıqasynda qazaqstandyq boksshy Ivan Dychko 91 keliden astam salmaqta frantsııalyq Tonı Iokamen kezdesti.
Qaı jarysta da sýpersalmaqtyń abyroı-bedeli bıik bolyp esepteledi. Sondyqtan qos boksshy baryn saldy. Qazaqstandyq boksshy qansha tyrysqanymen, tóreshilerdiń úsheýi de jeńisti Tonı Iokaǵa berdi. Sóıtip I.Dychko kúmis júldeger atanǵanymen, olımpıada joldamasyna qol jetkize almady. Bul salmaqta chempıonǵa ǵana lıtsenzııa beriledi.
Aıta keteıik, osyǵan deıingi eki álem birinshiliginde I.Dychko bir qola, bir kúmis medal enshilegen edi. Oǵan qosa London Olımpıadasynyń qola júldegeri degen ataǵy jáne bar. Almatyda 2013 jyly ótken álem chempıonatynda ázerbaıjandyq Magomedrasýl Medjıdovtan nokaýtpen jeńilip qalǵan Ivan jarty jyldaı úzilis alyp, rıngke qaıta shyqqan bolatyn. Bul - sodan keıingi alǵashqy jeńilisi. Dohada budan buryn 69 keli salmaqta Danııar Eleýsinov kúmis júldege qosa Olımpıada joldamasyn jeńip aldy. Sonymen, qazaqstandyqtar enshisinde bul chempıonatta jalǵyz ǵana joldama. Bul birinshilikte úzdik óner kórsetip, burynǵy bıikterine qaıta oralǵan kýbalyq boksshylar tórt birdeı altyn medaldi jeńip aldy. Komandalyq esepte ekinshi, úshinshi oryndy Reseı men Ázerbaıjan quramasy bólisti. Qazaqstan quramasynyń bas bapkeri Myrzaǵalı Aıtjanov osy birinshilik aldynda eki altyn medal, tórt Olımpıada joldamasyn ıelenýdi josparlap otyrmyz, dep málimdegen bolatyn. Ókinishke qaraı, qazaqstandyqtar bul mejeden kórine almady. Endigi bar úmit - aldaǵy jylǵy Rıo-de-Janeıro Olımpıadasynda.
