Bokstan ÁCh: Búgin Karına Ibragımova fınaldyq jekpe-jegin ótkizedi

ASTANA. QazAqparat – Úndistannyń Nıý-Delı qalasynda bokstan áıelder arasynda ótip jatqan álem chempıonatynda qazaqstandyq Karına Ibragımova búgin fınaldyq jekpe-jegin ótkizedi, dep habarlaıdy QazAqparat tilshisi.

Qazaqstandyq boksshy 57 kelige deıingi salmaqta ıtalııalyq Irma Testamen qolǵap túıistiredi.

Qos sportshy Astana ýaqytymen saǵat 18.30-da bastalatyn keshki sessııada úshinshi jekpe-jekte rıngke shyǵady.

Álem chempıonaty «Qazsport» telearnasynan tikeleı efırde kórsetiledi.

Osyǵan deıin Azııa chempıony atanyp, eki márte álem birinshiliginiń qola júldegeri bolǵan K.Ibragımova endi keminde kúmis medal alady.

Irma Testa da osal qarsylas emes. Ol – 2020 jylǵy Tokıo olımpıadasynyń qola, ótken jylǵy álem birinshiliginiń kúmis júldegeri, 2019 jylǵy Eýropa chempıony.

Taǵy bir qazaqstandyq Lázzat Kúngeıbaeva asa aýyr salmaqta erteń altyn úshin talasady. Al Alýa Balqybekova, Nadejda Rıabets, Valentına Halzova jáne Farıza Sholtaı qola júldeger atandy.

Eske sala keteıik, budan buryn Karına Ibragımovanyń eki dúrkin álem chempıonyn utyp, fınalǵa shyqqanyn jazǵan bolatynbyz.

Sondaı-aq bokstan álem chempıonatynda qazaqstandyqtardyń altyn úshin kimder talasatyny habarlandy.