Bokstan ÁCh: Bekzat Nurdáýletov jartylaı fınalǵa ótti

NUR-SULTAN. QazAqparat - Reseıdiń Ekaterınbýrg qalasynda ótip jatqan bokstan álem chempıonatynda qazaqstandyq Bekzat Nurdáýletov jartylaı fınalǵa joldama aldy, dep habarlaıdy QazAqparat tilshisi.

Bekzat Nurdáýletov 81 keli salmaqtaǵy jarysty alǵashqy kezeńnen bastady. Onda aldymen Ońtústik Koreıadan kelgen Ingı Hondy tize búktirdi. Odan keıin 1/16 fınalda kolýmbııalyq Kalek Norbaıdy tize búktirse, oǵan 1/8 fınalda brazılııalyq Keno Machado qarsy tura alǵan joq.

Bekzat búgin túrkııalyq Baıram Malkanmen qolǵap túıistirdi. Jekpe-jek barysynda tartysty báseke órbidi.

Buǵan deıin qazaqstandyq boksshylar qatarynan Sáken Bıbosynov (52 keli), Tursynbaı Qulahmet (75 keli) jáne Vasılıı Levıt (91 keli) pen Abylaıhan Júsipov jartylaı fınalǵa joldama alǵan edi.

Al Qaırat Erálıev alǵan jaraqatyna baılanysty ózbek jigiti Mırazızbek Mırzahalılovke jol berdi.