Bokstan 2021 jylǵy álem chempıonaty ótetin ýaqyt belgili boldy
NUR-SULTAN. QazAqparat - Bokstan erler arasyndaǵy 2021 jylǵy álem chempıonaty ótetin ýaqyt naqtylandy, dep habarlaıdy QazAqparat tilshisi.
Álemniń úzdik bylǵary qolǵap sheberleri 26 qazan men 6 qarasha aralyǵynda Serbııa astanasy - Belgrad qalasynda baq synaıdy. Bul jóninde AIBA basshylyǵy málim etti.
Aıta keteıik, álem chempıonaty 1974 jyldan beri turaqty túrde ótkizilip keledi. Búgingi kúnge deıin qazaqstandyq boksshylar barlyǵy 46 medal enshilegen bolatyn. Olardyń 12-i altyn, 13-i kúmis, 21-i qola medal.
2019 jyly Reseıdiń Ekaterınbýrg qalasynda ótken dúbirli dodada qazaqstandyq Bekzat Nurdáýletov (81 keli) altyn oljalady.
Al Qamshybek Qońqabaev (91 keliden joǵary) kúmis alsa, Sáken Baıbosynov (52 keli), Abylaıhan Júsipov (69 keli), Tursynbaı Qulahmet (75 keli), Vasılıı Levıt (91 keli) qola júldeger atandy.
