Bokstaǵy búgingideı jeńister balǵyn sportshylardy jigerlendiredi - A.Tshanov
ASTANA. QazAqparat -Gennadıı Golovkıniń IBF chempıony Davıd Lemege qarsy jekpe-jegindegi basymdyǵy birinshi mınýttardan bastap baıqaldy. Bul týraly «QazAqparat» tilshisine bergen suhbatynda Respýblıkalyq sport kolledjiniń dırektory, Bokstan Qazaqstan Respýblıkasyna eńbegi sińgen jattyqtyrýshy Amalbek Tshanov málim etti.
«Búgingi jekpe-jekti aldyn ala boljaýǵa bolar edi. Sebebi, Gennadııdiń búgingi deńgeıi óte joǵary, ıaǵnı buny birinshi mınýttardan bastap baıqadyńyzdar. Orta salmaqtaǵylardyń ádisterdi kóp qoldanýǵa múmkindigi bar jáne Qazaqstan boksshysy osy turǵyda belsendiligin kórsete aldy. Sondyqtan da IBF chempıony Davıd Lemeniń Golovkınnen qaımyǵyp júrgeni kórinip turdy. Osyndaı jekpe-jekke rýhpen, jigermen shyqpasa, jeńiske jetý ekitalaı», - dedi Qazaqstan Respýblıkasyna eńbegi sińgen jattyqtyrýshy.
Osy oraıda Amalbek Qozybaquly tanymal boksshy Gennadııdiń osy salmaqta áli de kezdesetin qaýqarly qarsylastary bar ekenin, alaıda olar túrli sebeptermen Golovkınmen jekpe-jekke shyqpaı júrgenin atap ótti.
Sonymen qatar ol sporttaǵy búgingideı jeńister balǵyn sportshylardy jigerlendirip, sportqa tartýǵa jaqsy baǵyt- baǵdar beretinin jetkizdi.
Budan bólek, A. Qozybaquly jaqynda Doha qalasynda ótken erler arasyndaǵy bokstan álem chempıonaty nátıjesine toqtala kele, «ókinishke qaraı, bizdiń sportshylar altyn júldeni ıelene almady. Sondyqtan da bul másele bizdi oılandyryp, qajetti qadamdar jasaýǵa yqpal etýi tıis», - dedi.
