Boksshylarymyz London Olımpıadasynda qazaq elin álemge tanytady dep senemiz - N. Sabılıanov

- Nurtaı Salıhuly, bokstan elimizdiń basty dodasy Astanada bolyp ótti. Bıylǵy Qazaqstan birinshiliginen qandaı áser aldyńyz?

- Joǵary deńgeıde ótti dep esepteımin. 4-5 kún boldy «Dáýlet» sport keshenine kelip, jankúıer boldyq. Boksshylarymyz jaqsy daıyndyqpen kelgeni baıqalyp tur. Ásirese, Shyǵys Qazaqstan oblysynyń bylǵary qolǵap sheberleri bul jarysqa óte joǵary daıyndyqpen kelgenin dáleldep berdi. 4 altyn, 2 kúmis, bir qola júldege ıe bolyp, jalpy komandalyq esepte shyǵysqazaqstandyqtar birinshi oryndy jeńip aldy.

Atap aıtar bolsam, Shyǵys Qazaqstannan saıysqa túskenderdiń ishinde áli tájirıbesi óte mol bolmaǵanmen, jeńiske jigeri bar, júregi bar jigitter sharshy alańda qarsylastaryn jeńip, bıik tuǵyrǵa kóterildi. Olardyń qatarynda 19 jasar Aıdar Ámirzaqov sport sheberligine úmitker bolsa da, nebir tanymal sportshylardy joldan taıdyryp, 60 kılá salmaqta jeńimpaz atandy. Fınaldyq kezdesýinde qostanaılyq Samat Báshenovty 10:1 esebimen aıqyn jeńgeninde barlyq jankúıer Aıdarǵa qol soǵyp, qoshemet kórsetip, keleshegine úlken úmit artty. Sonymen qatar 51 kıláda sport sheberligine úmitker, semeılik 20 jasar Mıras Jaqypov ta qaısar minez, sheber óner kórsetip, barlyq qarsylastaryn jeńip, 2010 jylǵy el chempıony atandy. 69 kıláda synǵa túsken Manat Ómirzaqov ta sport sheberligine úmitker bolǵanyna qaramastan, halyqaralyq dárejedegi sport sheberi, asa tájirıbeli qyzylordalyq Rústem Sybaevty jeńip, bas júldege ıe boldy.

Osy el birinshiliginde Shyǵys óńirinen kelgen sportshylardyń ishinde 64 kılá salmaq boıynsha qatysqan Ádilet Egizekov óte jaqsy óner kórsetti, jarys qorytyndysynda kúmis júldege ıe boldy. Sol sekildi halyqaralyq jarystarda el namysyn qorǵap júrgen tájirıbeli boksshy, 26 jasar Mırjan Raqymjanov ta óz sheberligin tanytyp, jankúıerlerdiń qoshemetine bólengen jigittiń biri. Ol sońǵy kezdesýine deıin barlyq qarsylastaryn aıqyn basymdyqpen jeńip keldi. Tek fınalda astanalyq Danııar Tólegenovke ese jiberip aldy. Degenmen el birinshiliginiń kúmis júldesine ıe boldy.

Astanalyq Іlııas Súleımenov (48 kg) pen Danııar Eleýsinov (64 kg) jaqsy óner kórsetti. Shyǵys óńirinen shyqqan 25 jasar, tájirıbeli boksshy Danabek Sýjanov 75 kılá salmaq boıynsha elimizdegi úzdik boksshy ekenin taǵy da dáleldep, Qazaqstannyń eki dúrkin jeńimpazy atandy.

Jankúıerlerdi súısinterlik óner kórsetken aqmolalyq Jandos Momynov pen Nurdáýlet Jarmanovty, qaraǵandylyq Almat Serimovty, qostanaılyq Jan Kosobýtskııdi aıta ketý kerek.

- Jarys barysynda nazaryńyzǵa ilikken kemshilikter boldy ma?

- Keıbir kezdesýlerde boksshylardyń soqqysy eseptelmeı qalǵan sátterin baıqadyq. Qarsylasyn qaıta-qaıta qushaqtap, ýaqyt sozyp júrgen sportshyǵa eskertý berilýi tıis. Keıde osy jaǵy eskerýsiz qalyp jatty. Mysaly, jartylaı fınalda aýyr salmaqtaǵy Rústem Іrgebaev pen Ivan Dychko kezdesýi 3:4 nátıjesimen aıaqtaldy. Jeńis I.Dychkoǵa berildi. Alaıda, Dychko ekinshi jáne úshinshi raýnd boıy Іrgebaevty ustaýmen júrdi. Oǵan tóreshi eskertý jasap, upaıyn kemitýi kerek edi. Biraq olaı bolǵan joq. Jáne de R.Іrgebaevtyń eki-úsh soqqysy esepke alynbaǵan kezde jankúıerler shý kóterdi. Osy salmaqtaǵy jaqsy óner kórsetken Rýslan Myrsataev ta qazylar alqasy tarapynan durys baǵasyn alǵan joq. Osyndaı kemshilikter oryn aldy. Bolashaqta mundaı olqylyqtarǵa jol berilmeıdi dep oılaımyn.

Óıtkeni bul jerde bizder jershildikke, týysqandyqqa tartyp, júlde bermeýimiz kerek. Nemese boksshynyń ataq-dańqyna qaramaı, kim myqty bolsa, sonyń ádil jeńiske jetýine kedergi keltirmeýimiz abzal. Qazaqstan boksshylary erteńgi kúni álemdik deńgeıde qalaı óner kórsete alady? Eldiń namysyn qorǵaýǵa kim laıyqty? Osy turǵyda baǵalaýymyz kerek.

- Sheberligin shyńdaı túsken tanymal boksshylardyń óner kórsetýine qarap, sondaı-aq qanaty jetilip kele jatqan jastarǵa súısine otyryp, qandaı oı túıdińiz?

- Boks búgingi tańda qazaq sportynyń betke ustar túrine aınalyp otyr. Bárimiz jankúıer retinde qoldaý kórsetip, el ishinen tý ustaıtyn jigitterdiń ósip-jetilýine qoldaý jasaýymyz qajet. Biz boks ónerin órge bastyryp, álemdik, halyqaralyq jarystarda jeńip shyǵyp, Ánuranymyzdy shyrqatyp júrgen sportshylarymyzǵa árdaıym tileýlespiz. Osy jarystyń basty ereksheligi daryndy jastar ósip kele jatqanyn kórsetti.

Jas urpaqtyń salaýatty ómir saltyn ustanyp, onyń syrtynda belgili bir sport túrimen aınalysyp, el namysyn qorǵap júrýi úlken azamattyq is dep bilemin. Osyndaı azamattardyń Otanǵa, halqyna degen súıispenshiligin jastarǵa tárbıe retinde usynýymyz qajet. Patrıottyq tárbıe Otanǵa, halyqqa qyzmet istesem degen izgi nıetten, naqty qadamnan bastaý alady.

Qazaqstan boks federatsııasynyń prezıdenti Tımýr Qulybaev bastaǵan ujymnyń atqaryp otyrǵan qyzmeti joǵary dárejede dep aıtýǵa bolady. El birinshiligi jaqsy uıymdastyryldy. Sońǵy jyldary boksshylarǵa naqty qamqorlyq jasalyp, sportpen aınalysýyna tolyq múmkindik berilgen. Búgin sonyń nátıjesin kórip otyrmyz. Buryn boks federatsııasynyń oblystardaǵy fılıaldary óz deńgeıinde jumys isteı almaýshy edi. Osy kemshilik qazir joıylǵan. Óńirlerde boks salasyna qajetti qarjy jáne uıymdastyrý sharalaryn júzege asyrý jolǵa qoıylǵan.

Búgin jarqyldap rıngke shyǵyp, el yqylasyna bólengen boksshylarymyz 2012 jyly London Olımpıadasynda Qazaq elin álemge tanytady degen senimimiz bar. Osy oraıda bárimiz de sportshylarymyzdyń babynda bolyp, jeńiske jetýine barlyq jaǵdaıdy jasaýymyz kerek.

- Rahmet!