Boksshylarymyz eki birdeı halyqaralyq týrnırden júldeli oraldy
ASTANA. QazAqparat - Ótken demalys kúnderinde Fınlıandııa men Polshada bokstan eki birdeı halyqaralyq týrnır ótti. Onda qazaqstandyq boksshylar 8 medal: 4 altyn, 1 kúmis, 3 qola utyp aldy. Bul týraly Qazaqstan boks federatsııasynan habarlady.
Qaırat Erálıev (56 kg), Aıdar Ámirzaqov (64 kg), Asqar Abdýllaev (91 kg) Helsınkı qalasynda 13 sáýirde ótken «GeeBee» týrnırinde birinshi oryǵa taban tirese, Jánibek Álimhanuly (75 kg) kúmisti enshiledi. Al Ádilet Qurmetov (52 kg) úshinshi oryndy mise tutty. Bul týrnırge 12 elden jalpy sany 66 sportshy qatysty.
Al Varshava qalasynda 12 sáýirde aıaqtalǵan «Felıks Shtamm» týrnırinde Jomart Erjan (49 kg) qarsylastarynyń barlyǵyn tize búktirip, eń joǵarǵy tuǵyrǵa kóterildi. Rýstam Svaev (75 kg) pen Alekseı Sevastıanov (91 kg) qola júldeni qanjyǵalaryna baılady.
Varshavadaǵy týrnırge qazaqstandyq komanda erler baǵdarlamasy boıynsha 6 salmaq dárejesine, áıelder boıynsha 3 salmaq dárejesine qatysty. Jarysqa 21 eldiń 97 er jáne 46 áıel sportshysy qatysqan bolatyn.
