Boksshylarymyz ben balýandarymyz jattyǵýdan keıin qazy men qara ýyldyryq jegisi keledi
ASTANA. QazAqparat - Qazaqstanda sportshylardy taǵammen qamtamasyz etýdiń tabıǵı normasy engiziledi. Bul týraly búgin QR Parlamenti Senatynyń Áleýmettik-mádenı damý jáne ǵylym komıtetinde «Dene tárbıesi jáne sport máseleleri boıynsha QR-nyń birqatar zańnamalyq aktilerine ózgertýler men tolyqtyrýlar engizý jónindegi» zań jobasyn talqylaý barysynda Mádenıet jáne sport vıtse-mınıstri Sáken Musaıbekov málim etti, dep habarlaıdy QazAqparat.
Osy rette depýtattar vıtse-mınıstrden zań jobasyna engizilip otyrǵan «tabıǵı norma» túsinigin tarqatyp berýdi surady.
«Sportshylardyń jattyǵý kezindegi júktemesi tsıkldik, kúshtik jáne qoldanbaly dep úshke bólinedi. Júktemeniń bul úsh túriniń aıyrmashylyǵy bar. Sondyqtan kalorııanyń jumsalýyna baılanysty tabıǵı norma da ártúrli bolady», - dedi ol.
Osy rette senator Biraǵanym Áıtimova sporttyń keıbir túrleriniń belgili bir deńgeıdegi qajettiligine baılanysty iriktelgen etpen qamtamasyz etý júrgizile me dep surady.
«Biz joǵary jetistikter sporty jaıynda aıtyp otyrmyz. Bizdiń árbir komandanyń sporttyq medıtsınadan kelgen dárigeri bar jáne dıetologtar da shaqyrylady. Olar sportshylar jattyǵýdan keıin qaıta tez kúsh jınaýy úshin qajetti as mólsherin anyqtaıdy. Sportshylar muny teris kórip otyrǵan joq. Degenmen, boks, kúres, dzıýdo syndy kúsh qoldanylatyn sport túrleriniń atletteri qazy men qara ýyldyryq suraıdy. Bul taǵamdar olardyń tez kúsh jınaýyna kómektesedi», - dedi S.Musaıbekov.
«Bul astamshylyq. Al biz sporshylardy astamshylyqqa daıyndap otyrǵan joqpyz», - dedi óz kezeginde senator.
