Boksshylar Qazaq eliniń úmitin aqtady - ulttyq quramanyń bas bapkeri
- Ǵalymbek Qalıuly, olımpıadalyq irikteý týrnıirin sátti aıaqtadyńyzdar. Kóńil- kúıińiz qalaı?
- Óte tamasha! Senim artqan serkelerimniń barlyǵy meniń ǵana emes, jalpy Qazaq eliniń úmitin aqtady. 8 boksshy alyp keldim, barlyǵy Olımpıadaǵa joldama jeńip aldy.
- Siz osyǵan deıingi bir suhbatyńyzda 6 joldama alsaq dep josparlaǵanyńyzdy aıtyp qalyp edińiz. Josparyńyz artyǵymen oryndaldy...
- Iá, árqashan aryq aıtyp, semiz shyqqanǵa ne jetsin. Ózderińiz de jarysty tikeleı efırden kórip jatqan bolarsyzdar. Eshqandaı osal qarsylasymyz bolǵan joq. Barlyǵy «sen tur, men ataıyn» degen boksshylar bolly. Biraq, bizdiń jigitter Olımpıada lıtsenzııasy úshin aıanyp qalǵan joq. Baryn saldy. Sonyń nátıjesinde Olımpıadaǵa tolyq quramda barýǵa múmkinlik aldyq.
- Medal úshin aıqasta keıbir boksshylarymyz joldamaǵa qol jetkizgennen keıin, maqsat oryndaldy dep bosańsyp ketken joq pa?
- Men olardyń bapkeri retinde olaı eseptemeımin. Barlyǵy da medal úshin shama kelgenshe judyryqtasty. Negizi, 63 keli salmaqta Zákir Safıýllın fınalda qarsylasynan bir bás joǵary túskendeı boldy. Biraq, tóreshiler onyń qarsylasyn jeńimpaz dep tapty. Eger Safıýllın jeńiske jetkende jalpykomandalyq esepte Ózbekstandy basyp ozyp, birinshi orynǵa kóteriler edik. Biraq, bul Olımpıada oıyndary emes, irikteý týrnıri ǵana. Sondyqtan, buıyrmaǵan medalǵa bola qapa bolýdyń qajeti shamaly. Esesine, Olımpıada oıyndaryna deıin qaı jerden qatelik jibergenimizdi pysyqtap, sol qateliktermen jumys isteýimiz kerek.
- 75 keli salmaqta el namysyn qorǵaǵan Ábilhan Amanquldyń fınaldaǵy aıqasyna qandaı baǵa beresiz?
- Ábilhan Amanqul ótken jyly jaraqatyna baılanysty kóptegen jarystarǵa qatysqan joq. Ózderińiz bilesizder, byltyr osy salmaqta Reseıde ótken álem birinshiligine Tursynbaı Qulahmet qatysqan bolatyn. Amanqul bir jyldyq úzilisten keıin osy olımpıadalyq irikteý týrnırine shyǵyp otyr. Sonda da Olımpıadaǵa joldama alyp qana qoımaı, fınalǵa deıin jetti. Bul jaman kórsetkish emes. Endi, Olımpıadaǵa deıin qateliktermen jumys isteımiz.
- 81 keli salmaqta atalǵan týrnırde qazaq boksshylary arasynan alǵashqy altyndy jeńip alǵan Bekzat Nurdáýlettiń jekpe-jekterine baǵańyz...
- Bekzat - jas boksshy. Jas bola tura ótken jyly álem birinshiliginde óz salmaǵynda qarsylas shaq keltirmeı, chempıon atandy. Jáne, búgin sol jeńisiniń kezdeısoq emestigin taǵy bir dáleldep, bas júldeni jeńip aldy. Jalpy, bolashaǵynan úlken úmit kúttiretin boksshylarymyzdyń biri dep sanaımyn.
- Rıo-de-Janeırodaǵy Olımpıadanyń kúmis júldegeri 91 keli salmaqta el namysyn abyroımen qorǵap júrgen Vasılıı Levıttiń kóptegen jarystarda fınalda joly kesile beretini týraly kópshilik qaýym jıi aıtyp júr. Alaıda, bul joly bas júldege kúmánsiz qol jetkizdi. Bul týraly ne aıtar edińiz?
- Levıt - quramadaǵy asa tájirıbeli, saqa boksshylardyń biri. Biz onyń áý basta joldamaǵa ıelik etetinine senimdi boldyq. Sondaı-aq jeńimpaz bolaryna da kúmán keltirgen joqpyz. Ózderińiz kórgendeı, qorjynymyzǵa ekinshi altyn júldeni syılady. Endi, Levıtke Rıoda ketken eseni qaıtaryp, chempıon bolý qaldy. Bul joly barlyq qarsylasyn kúmánsiz utty.
- Qaı boksshylardyń judyryqtasýyna kóńilińiz tolǵan joq?
- Negizi, barlyǵy keremet judyryqtasty. Eshqaısysyn bóle jarǵym kelmeıdi. Eń bastysy, Olımpıadaǵa tolyq quramda joldama utyp aldyq. Bizdiń maqsatymyz da sol bolatyn. Biz maqatty 100 paıyz oryndaı aldyq. Alaıda, arasynda kemshilikterimiz de boldy. Biz endi Olımpıada oıyndaryna deıin qateliktermen jumys isteımiz. Endigi maqsat - Olımpıada oıyndarynda top jarý.
- Áńgimeńizge rahmet! Maqsattaryńyz oryndala bersin...
Foto: sport.inform.k