Boksshylar Floıd Meıýezer men Mennı Pakıao ǵasyr jekpe-jegin ótkizedi
ASTANA. QazAqparat - Amerıkandyq boksshy Floıd Meıýezer men fılıppındik Mennı Pakıao ataqty jekpe-jegin ótkizedi. 12 raýndtyq jekpe-jekti kóptegen sarapshylar «ǵasyr saıysy» dep ataýda, ol Las-Vegasta (AQSh, Nevada shtaty) MGM Grand qonaqúıi arenasynda ótpek.
Saıysta 38 jastaǵy Meıýezer ıelengen 66,68 kelige deıingi salmaq sanatyndaǵy Búkilálemdik boks qaýymdastyǵynyń (VBA) jáne Búkilálemdik boks keńesiniń (VBS) álem chempıony ataǵy jáne 36 jastaǵy Pakıao ıelengen Búkilálemdik boks uıymynyń (VBO) álem chempıony ataqtary sarapqa túspek, dep habarlady TASS.
Bul jekpe-jek 3 mamyrda máskeý ýaqytymen tańerteń ótedi, bul boks tarıhyndaǵy uzaq kútken saıystardyń biri bolǵaly tur. Rıngte eki úmitker barlyq sanattardaǵy álemniń úzdik boksshysy ataǵyn ıelený úshin rıngke shyǵady. Olar kóp ýaqyt boıy jekpe-jekti ótkizýge ýaǵdalastyqqa jete almap edi, endi mine, sonyń sáti túskeli tur.
Saıys eń aldymen boks tarıhyndaǵy qymbat jekpe-jek bolyp, birden birneshe rekordqa qol jetkizedi. Onyń eń bastysy - boksshylardyń qalamaqysy. Saıysýshylardyń eńbekaqysynyń resmı somasy aıtylmaıdy, degenmen olar Meıýezerdiń paıdaasyna 60 paıyz da 40 paıyz kóleminde syıaqyny bólisedi. Soltústikamerıkandyq basylymdardyń málimetteri boıynsha, jekpe-jekte amerıkandyq 150-den 180 mln. dollarǵa deıin, al fılıppındik 100 mln-nan 120 mln. dollarǵa deıin tabys tabady. Aldyn ala málimetter boıynsha, bul jekpe-jek telekórsetilimge 3-4 mln. tapsyrysty jınaýy múmkin.
Al satýǵa túsken bıletter bir mınýttiń ishinde satylyp ketken. Onyń resmı baǵasy 1,5-7,5 myń dollardy quraıdy, biraq ta qaıtalama naryqta 100 myń dollardan asyp túsken. Onda boksshylardyń ózderi de biraz aqsha shyǵarǵan. Máselen, Pakıao óziniń týystary men dostaryna 900 bılet satyp alýǵa 3-4 mln. dollar jumsaǵan. Al onyń promoýteri Bob Arým rıngtiń qasyndaǵy oryn úshin bıletke 10 myń dollar tólegen.
Meıýezer - VBA jáne VBS nusqasy boıynsha bes salmaq sanatynda chempıondyq belbeýlerdiń ıegeri. Ol 47 ret jeńiske jetip, (28 nokaýt) birde-bir ret jeńilmegen.
Fılıppındik 66,68 kelige deıingi salmaq sanatynda VBO nusqasynda álem chempıony. Ol 57 jeńiske (38 nokaýt) jetip, 5 ret jeńiliske ushyraǵan jáne 2 ret teń oınaǵan.
