Boksshy Jánibek Álimhanuly CNN telearnasyna suhbat berdi
ASTANA. QazAqparat - Qazaqstandyq boksshy, 2013 jylǵy álem chempıony Jánibek Álimhanuly ataqty amerıkandyq CNN telearnasynyń 2022 jylǵy qysqy Olımpıada oıyndaryn ótkizýge úmitker qala Almaty týraly baǵdarlamasynyń túsirilimine qatysty. Bul týraly Qazaqstan boks federatsııasynyń baspasóz qyzmeti habarlaıdy.
Jánibek túsirilim barysyna qazaqstandyq boks týraly jáne jalpy sport týraly áńgimelep, 2022 jyly Olımpıada Qazaqstanda ótkiziletindigine senimdiligin bildirdi.
Al amerıkalyqtar bolsa óz mansabynda birqatar jetistikke qol jetkizip, búginde de alǵa umtylyp, el namysyn qorǵap júrgen Jánibekten sportqa qadam basýy týraly surastyrdy.
«Qazaqstan - kóptegen Olımpıada men álem chempıondaryn tárbıelep shyǵarǵan sporttyq memleket. Elbasynyń bastamasymen bizdiń memlekette sportpen belsendi aınalysý úshin barlyq jaǵdaılar jasalynýda, - deıdi Álimhanuly. - Men, óz kezegimde jankúıerlerdiń senimin aqtap, Katarda ótetin álem chempıonaty men Rıo Olımpıadasynda sátti óner kórsetý úshin qolymnan kelgenniń barlyǵyn jasaımyn».
Esterińizge sala keteıik, 2022 jylǵy qysqy Olımpıada oıyndaryn ótkizýge Almatymen qatar, Beıjiń qalasy da talasýda. Ótetin oryn aǵymdaǵy jyldyń 15 shildesinde Malaızııada anyqtalady.
