Boksshy Temirtas Júsipov Dúnıejúzilik áskerı oıyndarda chempıon atandy
KÓKShETAÝ. QazAqparat - Boksshy Temirtas Júsipov Qytaıda ótken Dúnıejúzilik áskerı oıyndarda chempıon atandy, dep habarlaıdy QazAqparat tilshisi Aqmola oblysynyń deneshynyqtyrý jáne sport basqarmasynyń baspasóz qyzmetine silteme jasap.
Vedomstvonyń málimetishe, Qytaıdyń Ýhan qalasynda 7-shi jazǵy Dúnıejúzilik áskerı oıyndary ótip, bokstan 49 keli salmaqta sharshy alańǵa shyqqan aqmolalyq bylǵary qolǵap sheberi Temirtas Júsipov birinshi oryndy jeńip aldy.
«Jerlesimiz Nıgerııa, Kenııa, Kolýmbııa, KHDR jáne Úndistannan kelgen boksshylarymen qolǵap túıistirdi. Bes kezdesýdiń barlyǵynda Temirtas joǵary sheberlik tanytyp, qarsylastaryn aıqyn basymdyqpen jeńdi»,- deıdi vedomstvonyń baspasóz qyzmetindegiler.
Týrnırdiń segizinshi kúngi nátıjesi boıynsha Qazaqstan quramasy jalpy komandalyq esepte 109 eldiń ishinde 11 orynnan kórindi. Ulttyq qurama qorjynynda 4 altyn, 3 kúmis jáne 5 qola medal bar.
