Boksshy Sadrıddın Ahmedov qazaqstandyq eki stýdentke grant bóldi

NUR-SULTAN. QazAqparat – Qazaqstandyq kásipqoı boksshy Sadrıddın Ahmetov Atyraý munaı jáne gaz ýnıversıtetiniń eki stýdentine óz qarajaty esebinen eki grant bóldi, dep habarlaıdy QazAqparat tilshisi.

«Safı Ótebaev atyndaǵy Atyraý munaı jáne gaz ýnıversıtetine baǵy janǵan stýdentke eki grant buıyrǵaly tur. Barlyq ýnıversıtetke bolashaqta sportshylardyń atynan grant buıyra bersin», - dep jazdy sportshy Instagram-paraqshasynda.

Eske salsaq, byltyr 7 jeltoqsan kúni Kanadanyń Monreal qalasynda Davıd Leme (41-4, 34 KO) men Maksım Býrsaktyń (35-6-2, 16 KO) boks keshi ótken edi. Onyń aıasynda Sadrıddın Ahmedov (11-0, 10 KO) te kezekti jekpe-jegin ótkizdi. «Soldat Q»-dyń qarsylasy argentınalyq boksshy Hose Antonıo Vılıalobos (12-6-2, 7 KO) boldy. On raýndqa eseptelgen jekpe-jek jetinshi raýndta merziminen buryn aıaqtalyp, Ahmedov opponentin aýyr nokaýtqa jiberdi.

Al keshe qazaqstandyq boksshy Halyqaralyq boks uıymynyń (IBO) reıtınginde óz salmaǵynda 27-shi orynda turǵany habarlandy.