Boksshy Nazym Qyzaıbaı Strandj kýbogynyń fınalyna shyqty

NUR-SULTAN. QazAqparat - Qazaqstandyq boksshy Nazym Qyzaıbaı Bolgarııa astanasynda ótip jatqan Strandj kýbogy týrnıriniń fınalyna shyqty, dep habarlaıdy QazAqparat tilshisi.

Atalǵan halyqaralyq týrnırde 50 keli salmaqta el namysyn qorǵap jatqan otandasymyz jartylaı fınalda Frantsııa boksshysy Roman Mýlaımen judyryqtasyp, qarsylasyn 5:0 esebimen tize búktirdi.

Tóreshiler bir aýyzdan (29:28, 30:27, 29:28, 29:28, 30-27) Qyzaıbaıdy jeńimpaz dep tanydy.

Aıta keteıik, álemniń eki dúrkin chempıony Nazym Qyzaıbaı shırek fınalda ıspanııalyq sportshy Laýra Fýertes Fernandespen jekpe-jekke shyǵyp, taǵy da tóreshiler sheshimimen jeńimpaz dep tanylǵan bolatyn.

Bul halyqaralyq jarysqa 36 elden 450 boksshy qatysyp jatyr.

Olardyń qatarynda Olımpıada, álem jáne Eýropa chempıondary da bar. Týrnır 28 aqpanda máresine jetedi.