Boksshy Nazym Qyzaıbaı sheberligin taǵy dáleldedi
ASTANA. QazAqparat - Qaraǵandyda QazKSR-diń eńbek sińirgen bapkeri Ǵalym Jarylǵapovty eske alýǵa arnalǵan jyl saıynǵy halyqaralyq týrnırdiń aqtyq saıystary ótti, dep habarlaıdy QazAqparat QR boks federatsııasyna silteme jasap.
Osymen 33-ret uıymdastyrylyp otyrǵan týrnırge alǵash ret olımpıadalyq baǵdarlamaǵa enetin salmaq dárejesindegi (51 kelige deıin, 60 kelige deıin jáne 75 kelige deıin) qyzdar qatysty.
51 keli salmaqqa deıingi álemniń eki dúrkin jeńimpazy Nazym Qyzaıbaı (Almaty) fınalda Ózbekstan sportshysy Azızabon Mamırovany utty.
60 kelige deıingi salmaqta - Qazaqstan men Ózbekstan elderiniń sportshylary taǵy kezdesti. Nátıjesinde, Aqmola oblysynyń boksshysy Karına Ibragımova jeńisin atap ótti.
75 kelige deıingi úshinshi salmaq dárejesinde Qaraǵandy oblysynyń týmasy Vıoletta Knıazeva men qyzylordalyq Aqerke Baqytjan kezdesti. Tartysty ótken jekpe-jek Vıoletta Knıazevanyń paıdasyna sheshildi.
Erler arasynda «altyn» úshin 49 kelige deıingi asa jeńil salmaqta Almaty oblysynyń bylǵary qolǵap sheberi Jandos Násipjan men Álisher Aıtqojanov aıqasty. Jeńis tuǵyrynan Jandos Násipjan kórindi.
52 kelige deıingi salmaqta Qaraǵandy oblysynan Aqnıet Baltabaev úzdik atandy. Ol fınalda Aqmola oblysynyń sportshysy Orazbek Asylqulovtan basym tústi.
56 kelige deıingi sportshylar arasynda birinshi oryn úshin Bekjan Quralov (Almaty oblysy) pen Qanat Turǵanbaev (Qaraǵandy oblysy) judyryqtasty.
60 kelige deıingi salmaq dárejesinde aqtyq saıysta jeńisti taǵy bir qaraǵandylyq - Sergeı Makarıhın atap ótti. Ol Almaty oblysynyń týmasy Mıras Ertanovqa jol bermedi.
64 kelige deıingi aıqasta jergilikti boksshy Maqsat Jeksenbın qostanaılyq Nıkolaı Shvabadan basym tústi.
Qostanaılyq boksshy Sergeı Karbyvnıchıı 69 kelige deıingi salmaq dárejesinde úzdik dep tanyldy.
Qostanaı oblysynyń sportshysy Rýstam Jýmagýlov (75 keli) tabandy jekpe-jekte qaraǵandylyq Vladıslav Stolbovty jeńe aldy.
Óz eline «altyndy» Qytaı ókili Erkin Janqoja (81 kelige deıin) alyp berdi, ol aýyr shaıqasta OQO týmasy Abzal Quttybekovty jeńdi.
91 kelige deıingi salmaqta Alekseı Sevastıanov (Qaraǵandy oblysy) ekinshi ret qatarynan úzdik atandy.
Asa aýyr salmaq dárejesinde (91 keliden joǵary) jergilikti boksshy Dmıtrıı Zısko QHR sportshysy Ahmet Maımatıge ese jiberip aldy.
