Boksshy Maık Toýell nokaýttan keıin kóz jumdy
ASTANA. QazAqparat - Jartylaı orta salmaqtaǵy shotlandııalyq boksshy Maık Toýell Deıl Evanspen ótken jekpe-jekte alǵan jaraqattan soń aýrýhanada qaıtys boldy, dep habarlady The Daily Mail.
Kezdesý 29 qyrkúıek kúni keshki ýaqytta Shotlandııanyń Glazgo qalasynda, Radisson Blu Hotel-de bolǵan. The Sun gazetiniń jazýynsha, Toýell birinshi raýndta nokdaýn alyp, besinshi raýndta nokaýt alǵan. Bul soqqynyń kúshtiligi sonshalyq, jekpe-jek toqtatylyp, Toýelldi aýrýhanaǵa alyp ketken.
Toýelldiń menedjeri sportshynyń aýyr jaraqat alǵanyn jáne hal ústinde jatqanyn habarlady. Ony ókpe jeldetkish apparatqa qosyp qoıdy. Alaıda, kórsetilgen medıtsınalyq járdemge qaramastan, 1 qazanǵa qaraǵan túni boksshy kóz jumdy.
Maık Toýell 25 jasta edi, kásibı boksta 12 kezdesý ótkizip, 11 oıyndy jeńispen, al bireýin teń aıaqtaǵan.
