Boksshy Marına Volnova: Juma saıyn jeti shelpek pisirip taratamyn

«Qazaly» aýdandyq qoǵamdyq-saıası gazetinde boksshy Marına Volnovanyń suhbaty jarııalanǵan eken. «QazAqparat» HAA atalǵan suhbatty oqyrmandaryna taratady.

- Marına, qazir qaıdasyz, nemen shuǵyldanyp júrsiz?

- Inchhondaǵy Azıada oıyndarynan keıin Qajymuqan esimdi qazaq jigitine turmysqa shyqtym. Ózi - Arqalyq qalasynan, áskerı adam. Ýnıversıtette oqyp júrgende tanysyp, jaqyn aralastyq. Aqyrynda ómirlik serigi bolýǵa usynys jasady. Áıel adam úshin otbasy eń birinshi kezekte turýy tıis dep oılaımyn. Qazir Astanada tirshilik etip jatyrmyz. Úı sharýasyndamyn, balalarymdy tárbıelep, joldasymnyń babyn jasaýǵa ýaqyt bólemin. Qazaq azamatymen ómirimdi baılanystyrý arqyly baqytymdy taptym.

- Qazaqqa jar, kelin bolǵan qalaı eken?

- Ózim qazaǵy kóp óńirden, onyń ishinde Qazaly aýdanynda týyp-óskenmin. Sondyqtan qazaqqa kelin bolý, jar bolý asa qıyn tıe qoıǵan joq. Jańa ortaǵa tez sińisip kettim.

- Kúıeýińizdiń týystary oryspen quda bolatynyn qalaı qabyldady? Toı biz jaqtyń úlgisimen ótken shyǵar...

- Týysqandary tarapynan eshqandaı qarsylyq bolmady. Qaıta barlyǵy meni ózderiniń qyzy retinde jyly qabyldady. Úılený toıymyz, álbette, qazaqtyń ádet-ǵurpyna saı ótti. Qudalyq, syrǵa salý sııaqty dástúrlerdi attap ketkenimiz joq.

- Qazaqtyń ulttyq dástúrlerin qanshalyqty bilesiz jáne ustanasyz?

- Tolyq bilemin degenim durys bolmas. Biraq turmys-tirshilikte qajetti, mańyzdy degen dástúrlerdi saqtaımyn jáne ustanamyn. Mysaly, ár juma saıyn jeti shelpek pisirip, kórshilerge taratamyn.

- Oramal taǵyp, sálem salasyz ba? Borş pen et tamaqtyń qaısysyn súısinip jeısiz?

- Árıne, oramal taǵyp, úlkenderge sálem salý ádetime aınalǵan. Jańa ómirdiń, jańa úıdiń tabaldyryǵyn attaǵan sátten bastap kelinge úlken jaýapkershilik artylady. Qaıynjurttyń qamyn jasap, sol úıdiń otymen kirip, kúlimen shyqqanda ǵana baqytty bola alasyń. Ókinishke qaraı, kúıeýimniń ákesi dúnıeden qaıtqan. Úıiniń jalǵyz uly. Enem - jaqsy kisi, ony «mama» deımin. Bárimiz de qazaqtyń et tamaǵyn óte jaqsy kóremiz.

- Bilesiz, bizde tuńǵysh balany áje men atanyń «menshigine ótkizetin» dástúr bar. Bul jaǵy qalaı boldy?

- Birinshi bala shańyraq kóterip, dúnıege sábı kelgende ata-ájesiniń alǵashqy nemeresin baýyryna salatyn dástúr baryn bilemin. Óıtkeni ata men áje - qazaqy tárbıeniń bastaýy. Orys mektebinde oqyǵanymmen qazaqtarmen jıi aralastyq, sondyqtan «shaldyń balasy» degen tirkes qulaǵymyzǵa ábden sińip qalypty. Degenmen, biz balalarymyzdy ózimiz baǵyp jatyrmyz. Ázirge otbasymyzda Temirjan men Danııal degen eki batyr kóz qýanyshymyz bolyp erjetip keledi. Úlken balamnyń atyn - enem, ekinshisiniń atyn tórkinim qoıdy.

- Kitap oqyǵandy jaqsy kóredi ekensiz. Qandaı aqyn-jazýshylar unaıdy?

- Aqyn-jazýshylardyń ishinde qazaqtyń bostandyǵy úshin kúresken Ahmet Baıtursynov, Maǵjan Jumabaevtardyń shyǵarmashylyǵyn joǵary baǵalaımyn.

- Qazaqtyń qandaı qanatty sózi sizge qanat bitiredi?

- «Otan otbasynan bastalady» degen sóz meni qanattandyrady. Óıtkeni otbasy - árkimniń shaǵyn Otany. Ásirese, áıel adamnyń orny - ot basy, oshaq qasynda. Al karera, taǵy basqasy - qosymsha qajettilikter ǵana.

- Rıngtegi tásilder ómirde qanshalyqty kerek? Kúıeýińiz úılenbeı turyp boksshy qyzben aralasyp júrgenin bildi me?

- Rıngtegi meniń «jeńiske jetem» degen talpynysym maǵan árdaıym rýh beredi, kúsh syılaıdy. Al bylaıǵy ómirde bireý-mireý tıisip kórgen emes, sondyqtan bokstyń ádis-tásilin paıdalanyp, qorǵanýdyń qajeti bolmapty. Kúıeýim boksshy ekenimdi qyz ben jigit bop aralasyp júrgenimde-aq bilgen. Ol da kezinde bokspen aınalysqan.

- Aldaǵy ýaqytta sizdi sport arenasynan kóre alamyz ba? Óz aldyńyzǵa boks mektebin ashýǵa qalaı qaraısyz?

- Bári de múmkin, biraq qazir men úshin birinshi orynda meniń januıam tur. Sportqa qaıta oralatyn-oralmaıtynymdy ýaqyt kórsetedi. Eger úkimet tarapynan kómek kórsetilse, boks mektebin ashýǵa, izbasarlar tárbıeleýge daıynmyn.

- Rahmet!

Suhbattasqan Nazerke SANIıAZOVA.