Boksshy Erjan Jomart Azııa birinshiliginde birinshi qarsylasyn utty
ASTANA. QazAqparat - Tashkentte ótip jatqan bokstan Azııa birinshiliginde Erjan Jomart taıpeılik Hon Da Lınany 3:0 esebimen utty. Bul týraly Qazaqstannyń boks federatsııasynyń baspasóz qyzmeti habarlady.
49 keli salmaq dárejesinde sharshy alańǵa shyǵyp júrgen Erjan Jomart chempıonanttyń shırek fınalyna shyqqan jeńisi týraly qysqasha aıtyp berdi: «Taıpeı sportshysyna qarsy jekpe-jek ońaıǵa soqpady. Alaıda men ózime senimdi boldym, barlyq oılarymdy sátti iske asyra aldym».
- Bapkerlerdiń aıtqandaryn tolyq oryndaı aldyń ba?
- Árıne, júz paıyz oryndaldy.
- Kelesi qarsylasyń ózbekstandyq Hasanboı Dýsmatov bolady.
- Ol reıtıngte birinshi bolyp tur. Ońaıǵa soqpasy anyq, alaıda jeńý úshin barymdy salamyn. Aqylmen iske kirisý kerek. Ol da adam, Dýsmatovtyń da álsiz tustary bolýy tıis.
- Óz salmaq dárejeńde kim úzdik dep oılaısyń?
- Osnyda Azııanyń eń myqty boksshylary jınalǵan. Olar óz elderinde birinshi orynda tur. Sondyqtan Azııa birinshiliginde álsiz qarsylas joq dese de bolady.
Danııar Maılybaevtyń fotosy
