Boksshy Dıas Tastemirov qarsylasyn nokaýtqa túsirdi
Dıas Tastemirov ázerbaıjandyq boksshy Elvın Ahýnzadamen kezdesti. Basynda qazaq boksshysyna qorǵanýǵa týra keldi. Sebebi, qarsylasynyń qarqyny basym-tuǵyn. Urymtal sátterdiń birinde tipti sharshy alańnyń bir buryshyna qamalyp, soqqynyń astynda qala jazdady. Alaıda qarsylasynyń shabýyldarynyń birinde Dıas ákki soqqysymen ázerbaıjandyqtyń qorǵanysyn buzǵan edi. Ahýnzada jerge qulaǵanymen, esin tez jınap aldy. Budan keıin ashýǵa býlyqqan ázerbaıjandyq qarymta jaýap berip, Tastemirovtiń tastaı qorǵanysyn buzyp, bir-eki soqqy jasady. Osylaısha, aıqastyń alǵashqy raýndy qyza túsken tusta gong soǵylǵan edi.
Ekinshi raýndta Elvın taǵy belsendilikpen bastady. Tópeleı soqqan soqqy qazaq boksshysyn abdyratyp tastaǵandaı kóringen. Biraq, kóp keshikpeı ázerbaıjandyq oılamaǵan jerden aýyr soqqy alyp, táltirektep qaldy. Budan keıin eseńgiregen qarsylasyn eseleı urǵan Dıas maqsatyna jetti. 10 sekýndtan buryn Elvın ornynan kóterilgenimen, aıaqqa áreń turǵan oǵan tóreshi aıqasty ary jalǵastyrýǵa ruqsat bermedi.
Aıta keterligi, Beıbit Shúmenovtyń aıqasynyń anderkartynda qazaq boksshylary 6 kezdesý ótkizip, altaýynda da jeńiske jetti.