Boksshy Danııar Eleýsinov álem chempıony ataǵynan aıryldy

ASTANA. QazAqparat - Tanymal qazaqstandyq boksshy Danııar Eleýsinov (11-0, 6 KO) Halyqaralyq boks uıymynyń (IBO) nusqasy boıynsha jartylaı orta salmaqtaǵy álem chempıony ataǵynan aıyryldy, dep habarlaıdy QazAqparat Sports.kz -ke silteme jasap.

2022 jyldyń 27 jeltoqsanyndaǵy jaǵdaı boıynsha Eleýsinov IBO saıtyndaǵy álem chempıondarynyń tiziminde joq, buǵan deıin onyń esimi men sýreti tıisti bólimde turǵan. Sonymen qatar bedeldi BoxRec.com portalynda jartylaı orta salmaqtaǵy chempıondyq belbeý bos dep kórsetilgen.

Eleýsinovtiń chempıon ataǵynan aıyrylýy boksshynyń jekpe-jekteri arasyndaǵy ýaqyt uzaqtyǵymen baılanysty bolýy múmkin. IBO erejesi boıynsha aýyr salmaqty qospaǵanda, árbir salmaq sanatyndaǵy álem chempıondary toǵyz aıda bir ret (aýyr salmaqtaǵylar úshin bul kezeń bir jyl) dárejesin qorǵaýdy talap etedi. Erejeni buzýǵa tek medıtsınalyq sebep boıynsha jáne/nemese IBO-nyń sheshimimen ǵana ruqsat beriledi.

Al qazaqstandyq boksshy Eleýsinov IBO tujyrymy boıynsha álem chempıony ataǵyn jeńip alǵannan beri birde-bir ret dárejesin qorǵamaǵan.

Danııar Eleýsinov sońǵy jekpe-jegin ótken jyldyń 18 jeltoqsanynda Astanada ótkizip, argentınalyq Hýan Ernan Lealdy (15-3, 4 KO) jeńip, IBO chempıony ataǵyn jeńip alǵan bolatyn.

Eske salsaq, buǵan deıin Danııar Eleýsinov jaqyn arada sporttyq mansabyn aıaqtaý máselesine qatysty pikir bildirip, boks ózine onsha unamaıtyndyǵy týraly aıtqan edi.