Boksshy Aıda Satybaldınovanyń kelesi qarsylasynyń esimi belgili boldy

ASTANA. QazAqparat - Qazaqstandyq boksshy qyz Aıda Satybaldınova kelesi jekpe-jegin 7 shilde kúni AQSh-ta ótkizedi, dep habarlaıdy «SPORTINFORM» SAA.

«Ledı Sparta» degen atpen boks álemine tanylǵan boksshy Tehas shtatyndaǵy Korpýs-Krıstı qalasynda «Atstekter hanshaıymy» atanǵan 25 jastaǵy amerıkalyq Selına Barıospen kezdesedi. Selına kásipqoı bokstaǵy tuńǵysh kezdesýin ótken jyly qańtarda ótkizgen. Osy kezde deıingi úsh jeńisiniń birin nokaýtpen aıaqtaǵan.

Jeńil salmaqtaǵy Satybaldınova - Barıos jekpe-jegi segiz raýnd formatynda ótedi.

Eske sala keteıik, Aıda kásipqoı bokstaǵy tórt kezdesýiniń úsheýin nokaýtpen aıaqtap, birinde teń nátıjeni qanaǵat etken. Meksıkadaǵy sońǵy jekpe-jeginde qazaqstandyq boksshy jeńil salmaqtaǵy WBF tıtýlyn jeńip alǵan bolatyn.