Boksshy A. Qojabekova Álem chempıonatynyń qola medalin qorjynǵa saldy
ASTANA. QazAqparat - Boksshy Aıjan Qojabekova Astanada ótip jatqan áıelder arasyndaǵy bokstan Álem chempıonatynyń qola medalin qanjyǵasyna baılady.
Búgin jartylaı fınalda 57 keli salmaqta óner kórsetetin A. Qojabekova úndi boksshysy S. Laterge 0:3 (37:39, 36:40, 36:40) esebimen ese jiberdi.
Osylaısha, Qazaqstan quramasynda ázirge 2 qola júlde bar.
Bunyń aldynda ǵana judyryqtasqan Jaına Shekerbekova da 51 kelide qola medalǵa ıe bolǵan edi. J. Shekerbekova brıtandyq boksshy, Olımpıada chempıony Nıkola Adamstan aılasyn asyra almady.
Endigi úmit - fınalǵa ótken úsh boksshyda.
Búgingi jartylaı fınaldyq kezdesýlerde Valentına Halzova, Dına Jolaman men Nazym Qyzaıbaı álemdik birinshiliktiń aqtyq synyna joldama alǵan bolatyn. 69 kelide óner kórsetetin Halzova jartylaı fınalda Germanııa sportshysy Nadın Apettspen judyryqtasqan. Onyń nátıjesi boıynsha qazaqstandyq boksshy kezdesýdi 3:0 (40:36, 40:36, 40:36) esebimen aıqyn jeńispen aıaqtady.
Nazym Qyzaıbaı 48 kelide óner kórsetedi jáne ol 1\2 fınalda Soltústik Koreıa bylǵary qolǵap sheberi ıAng Gým Ýdi jeńgen edi. Al 54 kelide judyryqtasatyn Dına Jolaman qytaılyq Lıý Pıaopıaony tize búktirdi.
Endi olar erteń, 27 mamyrda Astana ýaqytymen 15:00-de aqtyq synda baqtaryn synaıdy.
