Boksshylarymyz Olımpıadadan kemi 3-4 medal alyp keledi dep senemin – Ermahan Ybraıymov

ASTANA. KAZINFORM — Frantsııa astanasy Parıjde ótetin XXXIIІ Jazǵy Olımpıada oıyndarynyń bastalýyna sanaýly ǵana kúnder qaldy. Búgin sportshylarymyzdyń alǵashqy legi Almatydan Parıjge attanyp ketti. Osy oraıda, qazaqtyń dańqty boksshysy, 2000 jylǵy ótken Olımpıada oıyndarynyń chempıony, 1996 jylǵy Olımpıada oıyndarynyń jáne 1997, 1999 jylǵy álem chempıonattarynyń júldegeri Ermahan Ybraıymovpen suhbattasyp, sportshylarymyz týraly pikirin suraǵan edik.

- Ermahan Saǵıuly, Parıj Olımpıadasy jaqyndap keledi. Keshe ǵana ózińiz de olımpıadashylarymyzdy Parıjge attandyrý saltanatty sharasyna qatysyp qaıttyńyz. Sportshylarymyzdyń Olımpıadaǵa daıyndyǵy qalaı?

- Iá, keshe olımpıadashylarymyzdy Parıjge shyǵaryp salý saltanatty sharasyna baryp keldim. Іs-shara óte joǵary deńgeıde ótti. Sportshylarymyzǵa batamyzdy berdik. Bizdiń jolymyzdy bersin dep tiledik. Jalpy, sportshylarymyzdyń kóńil kúıi óte kóterińki boldy. Jalyndap turǵan jastarymyzdy kórdim. Іshinde osyǵan deıin bir emes, eki ret, úsh ret Olımpıadaǵa qatysqan tájirıbeli sportshyylarymyz da bara jatyr. Sol úshin Parıjde bir emes, birneshe ret kók týymyz jelbireıdi degen senimdemin.

- Ózińiz dańqty boksshy, talantty bapker retinde qaı boksshyǵa basty úmit artyp otyrsyz?

- Endi boksshylarǵa oralatyn bolsaq, bizdiń erler quramasy ózderińiz biletindeı, tolyq quramda jeti salmaqtan Olımpıadaǵa joldama aldy. Osy jeti salmaqtan bara jatqan barlyq boksshylarymyz júldege laıyqty. Árkim óz salmaǵynyń úzdigi. Bas bapker Myrzaǵalı Aıtjanov kil myqtylardy saıdyń tasyndaı iriktedi. Endi onyń shákirtteri Olımpıadadan kemi 3-4 medal alyp beredi dep senemin. Bıyl boksshylardan bir nemese eki chempıon shyǵyp qalar degen úmittemin.

- Olımpıada oıyndarynda qazaq boksshylaryna eń myqty qarsylas qaı eldiń boksshylary bolýy múmkin?

- Bıylǵy Parıj Olımpıadasyna jer betinen tolyq quramda joldama jeńip alǵan eki-aq el bar. Onyń biri – bizdiń Qazaqstan. Al ekinshisi – Ózbekstan. Demek, bizdiń basty qarsylastarymyz osy kórshi aǵaıyndar bolatyny sózsiz. Alaıda ózbek boksshylaryn biz de jaqsy bilemiz. Osyǵan deıin talaı syndarda jigitterimizdiń joly túıisip júr. Boksshylar kimniń kim ekenin jaqsy biledi. Jalpy qazaq boksshylary eshqashan qarsylastarynan qaımyǵyp kórmegen. Eń bastysy sportshylarymyz jarysqa deıin jaraqat alyp qalmaı, rıngke babynda shyqsa eken deımiz. Jerebe ońynan túsip, sáttilik serik bolsyn dep tileımiz.

- Áńgimeńizge raqmet!