Boksshy Rımma Volosenko Parıj Olımpıadasyna joldama ala almady

ASTANA. KAZINFORM - Taıland astanasy Bangkok qalasynda ótip jatqan bokstan Olımpıadaǵa irikteý týrnırinde búgin, 29 mamyrda qazaqstandyq Rımma Volosenko (60 keli) qarsylasyna ese jiberdi.

Qazaqstandyq boksshy úndistandyq Ankýshıta Boromen kezdesken edi. Tartysty ótken jekpe-jekte tóreshiler qarsylasynyń qolyn kóterdi.

Osylaısha Rımma jarys jolynan shyǵyp qaldy. 

Endi áıelder quramasynan Nazym Qyzaıbaı (50 keli), Valentına Halzova (75 keli) saıysqa túsedi.

Al qazaqstandyq Uljan Sársenbek (54 keli) pen Natalıa Bogdanova (66 keli) jarys jolyn aıaqtady.

Aıta ketsek, qazirge deıin áıelder quramasynda Karına Ibragımova Parıj Olımpıadasyna joldama alǵan edi. Ol mundaı múmkindikke byltyr qazan aıynda Qytaıda ótken Azıadada qol jetkizdi. 

Endi búgin el quramasynan Muhammedsabyr Bazarbaıuly (63.5 keli) ıtalııalyq Djanlýıldjı Malangamen rıngke shyǵady.

Elimizdiń erler quramasy buǵan deıin Olımpıadanyń 6 joldamasyn jeńip aldy. Atap aıtqanda, olardyń qatarynda Sáken Bıbosynov (51 keli), Mahmud Sabyrhan (57 keli), Aslanbek Shymbergenov (71 keli), Nurbek Oralbaı (80 keli), Aıbek Oralbaı (92 keli) jáne Qamshybek Qońqabaev (92 keliden joǵary) bar.