Boksshy qyzdarymyzdyń Olımpıadaǵa daıyndyǵy qandaı
ASTANA. KAZINFORM — Frantsııa astanasy Parıj qalasynda ótetin XXXIII jazǵy Olımpıada oıyndarynyń bastalýyna sanaýly kúnder ǵana qaldy. Osy oraıda bokstan áıelder quramasynyń bas bapkeri Eldos Saıdalınge arnaıy qońyraý shalyp, burymdy boksshylarymyzdyń Olımpıadaǵa daıyndyǵy týraly surap bildik.
— Eldos Jánibekuly, Parıj Olımpıadasynyń bastalýyna sanaýly kúnder ǵana qaldy. Burymdy boksshylarymyzdyń daıyndyǵy qalaı? Oqý-jattyǵý jıyndaryn qazir qaıda, qalaı ótkizip jatsyzdar?
— Sońǵy ret Taılandtaǵy lıtsenzııalyq týrnır aıaqtalǵannan keıin eki toptyq oqý-jattyǵý jıynyn josparlaǵan bolatynbyz. Sonyń birinshisi aıaqtaldy. Dál qazir qyzdar úılerine tarap, bir aptalyq demalysqa shyqty. Endi 9 shildede qaıta jınalyp, 21 shildege deıin sońǵy oqý-jattyǵý jıynyna kóshemiz. Sońǵy daıyndyǵymyz Almaty oblysynda ótedi. Qyzdarymyz belgilengen keste boıynsha jattyǵyp jatyr.
— Boksshy qyzdarymyz tórtjyldyq dodaǵa qanshalyqty daıyn? Úsh qyzymyzdyń qaısynan kóbirek úmit kúte alamyz?
— Oqý-jattyǵý jıyndaryn oıdaǵydaı ótkizdik dep esepteımin. Olımpıadaǵa baratyn úsh boksshy qyzymyzdyń úsheýi de — tájirıbeli, óz salmaǵynyń úzdigi. Sondyqtan Olımpıada oıyndarynda el úmitin aqtaýǵa bar kúsh-jigerin salady dep senim artyp otyrmyz. Úsheýi de júldege laıyq dep sanaımyn. Biraq Olımpıada oıyndaryna eń myqty boksshylar qatysady. Sondyqtan, ár jekpe-jek ońaı bolmaıtyny anyq.
— Siz ulttyq quramaǵa Olımpıada oıyndary aldynda ǵana keldińiz. Basty dodanyń aldynda ózińizdiń jeke josparyńyzdy júzege asyrýǵa ýaqytyńyz jetkilikti bolyp jatyr ma?
— Árıne, jetkilikti. Ulttyq quramanyń tizginin ustaǵanǵa deıin de jastar quramasyn jattyqtyryp keldim. Bul orta maǵan jat emes. Mine, men kelgeli de úsh aıdaı ýaqyt boldy. Jospar boıynsha jumys jasap jatyrmyz.
— Shákirtterińizge naqty qandaı talap qoıyp otyrsyz? Aldaǵy josparlaryńyzdy bólise ketseńiz…
— Basty talap — Olımpıada oıyndarynda júldege iligý. Elimizdiń týyn jelbiretý. Ár sportshynyń armany da — osy Olımpıada tuǵyrynan kóriný. Biz sol shákirtterimizdiń armanynyń oryndalýyna kúsh salyp jatyrmyz.
— Burymdy boksshylarymyz Parıjge qashan attanady?
— 21 shilde kúni Parıjge jolǵa shyǵamyz. Olımpıadaǵa qatysatyn Nazym Qyzaıbaı (50 keli), Karına Ibragımova (57 keli) jáne Valentına Halzovadan (75 keli) bólek taǵy da sparrıngtik seriktes bolatyn úsh boksshyny ala ketýdi josparlap otyrmyz. Ázirge naqty kimniń baratynyn naqtylaǵan joqpyz. Buıyrsa, áıelder boksynan Nazym Qyzaıbaı 28 shilde kúni Olımpıadadaǵy alǵashqy jekpe-jegin ózkizýi múmkin. Biraq, kimniń qashan sharshy alańǵa shyǵatyny jerebe qorytyndysyna sáıkes belgili bolady.
— Áńgimeńizge rahmet!
Esterińizge sala keteıik, bıylǵy jyldyń basty dodasy 26 shilde men 11 tamyz aralyǵynda ótedi.
Oıynǵa álemniń 205 elinen 10 500 sportshy qatysady.
