Boksshy qyzdarymyz da júldege talasa alady – Ulttyq quramanyń bas bapkeri

ASTANA. KAZINFORM – Búgingi tańda bokstan Qazaqstannyń erler quramasy men áıelder quramasy Parıjde sheshýshi oqý-jattyǵý jıyndaryn ótkizip jatyr. Bapkerlerdiń aıtýy boıynsha shákirtteri jarysqa tas-túıin daıyn.

Búgin bokstan áıelder quramasynyń bas bapkeri Eldos Saıdalınge arnaıy qońyraý shalyp, burymdy boksshylarymyzdyń daıyndyǵy týraly surap-bilgen edik.

«Parıjge kelgende Frantsııadaǵy Qazaqstan elshiliginiń ókilderi kútip aldy. Qonaq úıge deıin jetkizip, qolushyn berdi. Jalpy, QR Týrızm jáne Sport mınıstrligi, QR Ulttyq olımpıadalyq komıteti, sondaı-aq, QR Boks federatsııasy tarapynan barlyq qoldaý kórsetilip jatyr. Boksshylarymyzdyń Olımpıadaǵa daıyndalýyna bar múmkindikter jasaldy. Biz Parıjge kelgenge deıin arnaıy jospar boıynsha oqý-jattyǵý jıyndaryn joǵary deńgeıde ótkizip keldik. Al keshe Parıjde alǵashqy jattyǵýymyzdy bastadyq. Bári ózimiz oılaǵandaı, jospar boıynsha ótip jatyr. Endi, 25 shilde kúni bolatyn jerebeni kútip otyrmyz. Qarsylastarymyz sol kúni belgili bolady», - dep atap ótti bas bapker Eldos Saıdalın.

Sonymen qatar, Parıj Olımpıadasynda ózi baptaıtyn shákirtteriniń júldege talasýǵa tolyq múmkindigi bar ekenin de jasyrmady.

«Olımpıada oıyndaryna eshkim jeńilemin dep kelmeıdi. Barlyq sportshynyń basty maqsaty – qarsylasyn utyp, jeńis tuǵyrynan kóriný. Ózderińiz bilesizder Parıj Olımpıadasyna áıelder quramasynan 50 kelide Nazym Qyzaıbaı, 57 keli salmaqta Karına Ibragımova jáne 75 keli salmaqta Valentına Halzova joldama jeńip aldy. Úsheýiniń de júldege talasýǵa múmkindigi bar. Bul boksshylarymyz ózderiniń myqtylyqtaryn dáleldep, Olımpıadaǵa qatysýǵa múmkindik alyp otyr. Parıjda da baryn salyp júldege talasa alady», - dedi bas bapker.

Esterińizge sala keteıik, osyǵan deıin bokstan erler quramasynyń bas bapkeri Myrzaǵalı Aıtjanov ta óz shákirtteriniń Olımpıadaǵa daıyndyǵy týraly aıtyp bergen edi.