Boksshy Angelına Lýkas otbasyndaǵy máselege kómektesken polıtseılerge alǵys bildirdi

TARAZ.KAZINFORM – Jambyl oblysynda ýchaskelik polıtsııa ınspektory Angelına Lýkasqa jáne onyń otbasyna quqyqtyq sıpattaǵy máselege baılanysty jedel kómek kórsetti.

QR ІІM baspasóz qyzmetiniń málimetinshe, otbasylyq kásipke qatysty quqyqqa qaıshy jaǵdaılar týyndap, ákesiniń densaýlyǵy nasharlaǵan sportshy polıtsııa bólimine júgingen.

Tártip saqshylary qoldanystaǵy zańnama talaptaryna sáıkes der kezinde túsindirý jumystaryn júrgizip, másele beıbit ári zańdy jolmen sheshimin tapty.

Kórsetilgen jedeldik, kásibılik jáne janashyrlyq úshin boksshy polıtsııa qyzmetkerlerine áleýmettik jeli arqyly alǵys bildirip, olardyń azamattarǵa árdaıym kómek kórsetýge daıyn ekenin atap ótti.

Buǵan deıin qazaqstandyq boksshy Angelına Lýkas (11-1, 5 KO) argentınalyq Debora Lopesti (21-3-1, 1 KO) jeńip, Boxrec.com saıtynyń reıtıngisindegi ornyn jaqsartqanyn jazǵan edik.