Boks: Juldyz Shaıahmetova jastar arasynda álem chempıonatynyń kúmis júldegeri atandy

NUR-SULTAN. QazAqparat – Polshanyń Keltse qalasynda ótip jatqan jastar arasyndaǵy álem chempıonatynda qazaqstandyq Juldyz Shaıahmetova kúmis júldeger atandy, dep habarlaıdy QazAqparat tilshisi.

J.Shaıahmetova 60 kg salmaqta fınalda úndistandyq Vınkamen rıngke shyqty.

Úndilik boksshynyń basymdylyǵymen ótken jekpe-jek barysynda Juldyz ekinshi jáne úshinshi raýndta nokdaýn alyp qaldy. Aqyry úshinshi raýndta kezdesý merziminen buryn toqtatylyp, jeńis Vınkaǵa berildi.

Sonymen qatar búgin Dana Dıdaı 75 kg salmaqta taǵy bir úndistandyq Sanamacha Chaný Tokchommen altyn júlde úshin talasady.

Eske sala keteıik, budan buryn úsh qazaqstandyq boıjetken Jasmın Qızzatova, Ásel Saǵatova jáne Eldana Tálipova qola júldeger atanǵan bolatyn.