Boks jeńimpazy rekordtyq júlde alady
ASTANA. 17 qyrkúıek. QazAqparat - Meksıkalyq boksshy Saýl Alvaresti jeńgen amerıkalyq boksshy Floıd Meıvezer 41 mıllıon dollar júlde alady, dep habarlaıdy BıBıSı.
Las-Vegasta Dúnıejúzilik boks qaýymdastyǵy (WBA) jáne Dúnıejúzilik boks keńesi (WBC) júıeleri boıynsha jartylaı jeńil salmaqtaǵy chempıondyq ataq úshin bolǵan kezdesýde jeńis upaı sany boıynsha amerıkalyqtyń jeńisimen aıaqtaldy.
12 raýndqa sozylǵan teketirestiń nátıjesi mynandaı: 114-114, 116-112, 117-111.
Eki ataqty boksshynyń kezdesýine qara bazardaǵy bılettiń baǵasy 30 myń dollarǵa deıin jetkendigi habarlandy.
Meıvezer búkil urys boıy ózin batyl ustasa, al meksıkandyq boksshy sylbyrlyq tanytyp, kezdesýdiń aıaǵynda qarsylasyna tizgindi berip qoıdy.
Osyndaı jaǵdaıda tóreshilerdiń bireýiniń tóbelesti teń dep jarııalaýy kóptegen kórermenderdiń túsinbestigin týdyrdy.
«Áńgime sheberlik týraly boldy, - dep túsinikteme berdi, álem chempıony. - Men óz sheberligimdi kórsettim».
«Men oǵan qalaı jetýdiń jolyn tappadym», - dep moıyndady Alvares. Ol osyǵan deıin 43 kezdesýdi jeńispen aıaqtap, óz qarsylastaryn 30 ret nokaýtqa jibergen bolatyn.
Mundaı moıyndaý bıletke qyrýar aqsha tólep, 23 jastaǵy Alvarestiń Meıvezerge laıyqty qarsylyq kórsetedi dep úmittengen kópshiliktiń kóńiline kirbiń túsirdi.
2013 jyly amerıkalyq eki kezdesýi úshin 73 mln. dollar aqsha tapty.
Mamyr aıynda ol otandasy Roberta Gerrerony ońaı utyp, ekinshi jyl qatarynan álemdegi eń joǵary tólenetin boksshy bolyp tanyldy.
Showtime amerıkandyq kabeldik telearnalardyń júıesimen aradaǵy 200 mln. dollarlyq kelisim boıynsha Meıvezerge taǵy da 4 kezdesý ótkizýge týra keledi.
