Boks: Valentına Halzova Italııadaǵy týrnırdiń shırek fınalyna shyqty

ASTANA. KAZINFORM – Búgin Italııanyń Býsto-Arsıtsıo qalasyndaǵy Parıj Olımpıadasynyń joldamalary sarapqa salynyp jatqan týrnırde qazaqstandyq boksshylardan alǵashqy bolyp sharshy alańǵa Valentına Halzova shyqty. Otandasymyz qarsylasyn jarys jolynan taıdyryp, shırek fınalǵa ótti. 

75 keli salmaqta el namysyn qorǵap jatqan otandasymyz 1/8 fınalynda túrkııalyq Bıýshra Ishıldardy 4:1 (30:27, 28:29, 29:28, 30:27, 30:27) esebimen jeńdi.

Búgin taǵy eki boksshymyz sharshy alańǵa shyǵady. Onyń biri - 66 keli salmaqta synǵa túsetin - Natalıa Bogdanova. Ol Astana ýaqytymen 23:45 shamasynda polshalyq Aneta Rıgelskamen qolǵap túıistiredi.

Al, ekinshi boksshymyz erler arasynda 92 keli salmaqta el namysyn qorǵap jatqan boksshymyz - Aıbek Oralbaı. Saǵat 01:15 shamasynda Ekvador boksshysy Hýlıo Sezar Kastılo Torrespen aıqasady.

Italııadaǵy týrnır 3 naýryzda bastalǵan bolatyn. Jarys 12 naýryz kúni máresine jetedi.

Atalǵan týrnırde erler arasynda 28, áıelder arasynda 21 joldama sarapqa salynýda.  Qazaqstan quramasynan erlerden 6, áıelderden 5 boksshy joldamaǵa talasyp jatyr.