Boks týraly qazaqstandyq fılm sporttyq kınofestıvalde júldege ıe boldy
ASTANA. QazAqparat - «Qazaqfılm» kınostýdııasynda túsirilgen Asqar Uzabaevtyń «Jol» fılmi 13-20 sáýir aralyǵynda Reseıde ótip jatqan «Krasnogorskıı» halyqaralyq sporttyq kınofestıvaline qatysyp, «Úzdik sıýjet» nomınatsııasy boıynsha jeńiske jetti.
"Qazaqfılmniń" baspasóz qyzmetiniń habarlaýynsha , atalmysh fılm Qazaqstandaǵy eń áıgili sport túri - boks týraly baıandaıdy. Kartına erejesiz jekpe-jekke qatysatyn jas jigit týraly.
«Jol» fılminiń túsirilimi Almaty qalasynda ótti. Túsirilim jumystarynyń bir bóligi qaladaǵy «Baraholka» atalyp ketken bazarda túsirilse, jattyǵý jumystary beınelengen kórinister Qazaq ulttyq agrarlyq ýnıversıtetiniń sport zalynda júrgizildi. Fılmdegi basty róldi «G.H.A.D» mýzykalyq tobynyń ánshisi, jas akter Nazar Sharhan somdaǵan. Al bas keıipkerdiń súıiktisiniń rólinde T.Júrgenov atyndaǵy Qazaq Ulttyq óner akademııasynyń túlegi Dınara Jumaǵalıeva oınaǵan. Al kartına barysyndaǵy eń jaǵymsyz keıipkerdiń beınesine QR Eńbek sińirgen artısi Dımash Ahımov («Sońǵy asý», «Prımıte Adama!»). Sonymen qatar fılmde jattyqtyrýshynyń rólin - QR Eńbek sińirgen artısi Erik Joljaqsynov, Temirlannyń ákesiniń rólin - Erjan Túsipov («Siz kimsiz Ka myrza?») oınaıdy.
Eske sala ketsek, 2003-shi jyly qurylǵan «Krasnogorskıı» halyqaralyq festıval - Shyǵys Eýropadaǵy jáne TMD elderindegi iri sporttyq kınobaıqaý. Kınofestıval prezıdenti - álemniń úsh dúrkin olımpıada chempıony, álemniń on dúrkin chempıony, on bir ret Eýropa chempıony - Irına Rodnına.
Bıylǵy jyly festıval baǵdarlamasyna 100-ge jýyq sport týraly kınotýyndylar túsken. Festıvalge qatysý úshin tańdap alynǵan 70-ke jýyq kórkem jáne derekti kınofılmder 15 elden usynylǵan. Olardyń arasynda: Reseı, Avstrııa, Belarýs, Ulybrıtanııa, Germanııa, Ispanııa, Italııa, Qazaqstan, Kanada, Moldova jáne t.b.
«JOL» fılmi Almatydaǵy bazarlardyń birinde jumys istep oǵan qosymsha jasyryn ótkiziletin erejesiz tóbeles jarystaryna qatysyp júrgen kóshe tóbelesimen shynyqqan jas jigittiń ómir-tarıhy baıandalady. Ýaqyt óte kele ol azamat ózi úshin kásipqoı bokstiń rıngi - ómirindegi eń mańyzdy dúnıe ekenin túısinedi. Ol kóshe tóbelesi men qoıylatyn básaqydan quralǵan kúndelikti tirshiligin tastap bokserlik klýbqa keledi. Alaıda ony ótken kúnderdiń elesi erkine qoıa berýge beıil emes...
Rólderde: Nazar Sharhan, Dýlat Jumaqadyr, Erjan Túsipov, Dımash Ahımov, Erik Joljaqsynov, Dınara Jumaǵalıeva, Erbolat Toǵyzaqov jáne basqalar.
