BOKS: Tórt jyl qatarynan úzdik atanǵan «Arlandar» bıyl da top jara ala ma? (FOTO)

Jerlesterimizdiń birinshi qarsylastary Venesýelanyń «Caciques Venezuela» klýby. Almaty qalasyndaǵy Balýan Sholaq atyndaǵy stadıonda ótetin aıqasta boksshylar 5 salmaq dárejesinde synǵa túsedi.

Búkilálemdik boks serııasynyń bıylǵy besinshi maýsymyna tórt qurlyqtan 16 memleket óz baqtaryn synaýǵa ótinish bildirgen. Endi sál sheginis jasap, bul WSB qandaı joba? Qandaı erekshelikteri bar? Osyǵan deıin qansha komanda óner kórsetti? Osy jaıynda qysqasha toqtalyp ótsek.

Búkilálemdik boks serııasy (WSB) - AIBA basshylarynyń ashqan jańa jobasy. Halyqaralyq áýesqoı boks qaýymdastyǵynyń prezıdenti doktor Chıng-Kýo Výdyń bastamasymen 2008 jyldyń tamyz aıynda usynylyp, 2010 jyldyń kúz aılarynda júzege asty. Osy jyly jobaǵa alǵash ret 12 komanda qatysyp, olar qurlyq boıynsha úsh topqa (Azııa, Amerıka, Eýropa) bólindi.

Jarystyń erejesi boıynsha jobanyń alǵashqy úsh maýsymynda boksshylar bes salmaq (54, 61, 73, 85, +91) dárejesi boıynsha kúsh synasty. Ár jekpe-jek úsh mınýttan bes raýndqa sozyldy. Boksshylar rıngke shlemsiz jáne jeıdesiz shyqty. Tóreshiler boksshylardyń ónerin 10 baldyq júıemen eseptedi. Al tórtinshi maýsymda WSB basshylary jobaǵa birqatar ózgerister engizdi. Naqtyraq aıtsaq, alǵashqy úsh maýsymda sportshylar bes salmaq dárejesi boıynsha, al tórtinshi maýsymda on salmaq dárejesinde (49, 52, 56, 60, 64, 69, 75, 81, 91, +91) óner kórsetti.

Bul jobanyń basty ereksheligi - ár salmaqta jekeleı syndarda jeńilmeı, tolyq upaı jınaǵan boksshylar Olımpıada oıyndarynyń joldamasyna ıe bolady. Osy joba aıasynda birinshi jáne ekinshi maýsymda úzdik shyqqan bes boksshy 2012 jylǵy London olımpıadasyna qatysqan bolatyn. Onyń biri - 54 kelide óner kórsetken jerlesimiz Qanat Ábýtálipov. Bul dástúr bıyl da óz jalǵasyn tappaq. Naqtyraq aıtsaq, 2016 jyly Rıo-de-Janeıroda ótetin Olımpıada oıyndaryna joldama beriledi.

Alǵashqy maýsymda osy sala basshylary WSB jobasy aıasynda óner kórsetken on eki komandany qurlyq boıynsha úsh topqa, ıaǵnı Amerıka, Azııa jáne Eýropa qurlyǵyna bóldi. Onda ár komanda ekinshi komandamen óz jerinde eki ret, syrt elde eki ret kezdesti. Osylaısha ár komanda óz tobynda on eki jekpe-jek ótkizip, qurlyqtyń úzdigin anyqtady. Óz qurlyqtarynan birinshi oryn enshilegen komanda jartylaı fınalǵa joldama alady. Jartylaı fınalǵa qatysatyn tórtinshi komanda ár toptan ekinshi oryn alǵan komandalardyń arasynan iriktelip alyndy. Bul maýsymda jerlesterimiz jeńis toıyn toılaýǵa bir taban qalǵanda súrindi. Naqtyraq aıtsaq, fınalǵa deıin shaldyqpaı jetip, sheshýshi synda frantsýzdyń «Parıj ıÝnaıted» komandasynan 6:4 esebimen utylyp, kúmis júldeni qanaǵat tutty.

Al ekinshi maýsymda Koreıa klýby, jáne AQSh-tyń Memfıs, Maıamı klýbtary jabylyp, ornyna Germanııa, Taıland pen Úndistan komandalary qosyldy. Al máskeýlik Franshız máskeýlik Dınamo sport qoǵamyna aýysyp, aty da sáıkesinshe «Dınamo Máskeý» bolyp ózgertildi. Bul jyly barlyq on eki komanda alty-altydan «A» jáne «B» toptaryna bólinip óner kórsetti. Bul jyly jerlesterimiz «A» tobynda baq synady. Ókinishke qaraı ekinshi maýsymda jartylaı fınaldan súrinip, úzdik úshtikke taban tiredik. Jartylaı fınalda jerlesterimizdiń jolyn Reseıdiń «Dınamo Máskeý» klýby bógegen edi.

Al úshinshi maýsym «Astana arlandary» úshin asa tabysty boldy. Aqyry ýystan eki jyl qatarynan sýsyp ketken jeńiske qol jetti. Osylaısha, Qazaq eliniń abyroıyn asyryp, mere­ıin ósirip, baıraǵyn jelbiretti. Úshinshi maýsymnyń fınalynda «Ýkraına atamandaryn» Astana tórindegi respýblıkalyq «Saryarqa» sport saraıynda aıqyn basymdyqpen utty. Ýkraınalyq klýbtyń quramynda rasynda da bokstyń atamandary boldy. Aıtalyq, bokstan eki dúrkin Olımpıada chempıony ári úzdik boksshyǵa beriletin Vel Barker kýbogynyń ıegeri atanǵan Vasılıı Lomachenko, London olımpıadasynyń chempıony Aleksandr Ýsık, London olımpıadasynyń kúmis júldegeri Denıs Berınchık jerlesterimizben qolǵap túıistirdi. Osyndaı bir ózi birneshe boksshyǵa tatıtyn súıekti saıypqyrandaryn ýkraındar úshinshi maýsymda fınaldyq synda «arlandarǵa» qarsy saldy. Myqtyny jyǵý qaıdan ońaı bolsyn, eki kún boıy jeńis úshin arpalysqan jekpe-jektiń árqaısysy jurttyń delebesin qozdyrdy. Biraq, eshkimniń ataq-dańqynan seskenbeıtin jerlesterimiz jankúıerlerine jeńis syılady. Tórtinshi maýsymda da «arlandarymyz» jeńis tuǵyrynyń bıik satysynan kórinbese de úzdik úshtiktiń qatarynan tabyldy.

Qarap otyrsańyz, «Astana arlandary» osy tórt maýsymnyń tórteýinde de júldesiz qalmaǵan. Bul kórsetkishke eshqandaı komanda qol jetkize alǵan joq. Osy oraıda birden aıta keteıik, jalpy bıylǵy jyldy qosa eseptegende, ıaǵnı bes maýsymda WSB jobasy aıasynda barlyǵy 24 komanda baq synapty. Tipti, alǵashynda AQSh eki komanda shyǵarǵan. Biraq birinshi maýsymnan soń eki komandasyn bireý etip qaıta jasaqtady.

Al birinshi maýsymda chempıon atanǵan Frantsııa klýby bul jobaǵa eki-aq maýsym qatysty da joq bolyp ketti. Sondaı-aq, Germanııa klýby úsh, Túrkııa komandasy eki maýsym óner kórsetti. Al Koreıa, Úndistan jáne Taıland klýbtary bir-bir maýsym ǵana qatysty. Al bizdiń «arlandar» WSB jobasyna turaqty túrde bes jyl qatarynan qatysyp kele jatqan alty komandanyń biri.

Al, bıyl atalǵan jobanyń besinshi maýsymynda 16 komanda segiz-segizden «A», «B» toptaryna bólinip synǵa túsedi. Olardyń úsheýi WSB aıqastaryna bıyl ǵana qosylǵan - komandalar. Atap aıtqanda, Marokko, Pýerto-Rıko jáne Venesýela aǵymdaǵy jyly ǵana óz komandalaryn WSB jobasyna qosqaly otyr. Al Ulybrıtanııa jáne Qytaı WSB sharshy alańyna qaıta oraldy.

«A» toby: «Algeria Desert Hawks», «British Lionhearts», «China Dragons», «Cuba Domadores», «Mexico Guerreros», «Morocco Atlas Lions», «Russian Boxing Team», «Ukraine Otamans». «B» toby: «Argentina Condors», «Astana Arlans», «Azerbaijan Baku Fires», «Caciques Venezuela», «Italia Thunder Boxing Team», «Puerto Rico», «Rafako Hussars Poland», «USA Knockouts».

Bul maýsymnnyń basty ereksheligi, ár komandada legıonerler sany 3-ten aspaýy kerek. Jalpy 66 jekpe-jek ótýi tıis. Ár topta 1- oryn alǵan komandalar avtomatty túrde jartylaı fınalǵa shyǵady. Sondaı-aq, ár toptaǵy 2-3- oryn alǵan komandalar shırek fınalǵa joldama alady. Al jekeleı syndarda 49, 91, +91 keli salmaqtarda - 1, 52, 56, 60, 64, 69, 75, 81 keli salmaqtarda - 2 joldamadan Rıo 2016 olımpıadasyna jalpy 17 boksshyǵa joldama úlestiriledi.

Endi búgingi ótetin jarysqa qaıta oralaıyq. Bıylǵy besinshi maýsymdaǵy alǵashqy jekpe-jekte «Astana arlandary» klýbynyń namysyn tek qazaqstandyq boksshylar qorǵamaq. Alǵashqy qarsylastarymyz Venesýelanyń «Caciques Venezuela» klýby ekenin joǵaryda aıtyp óttik.

Olaı bolsa, búgin el namysyn kimder qorǵaıdy? Qarsylastarymyz kimder? Búgin 49, 56, 64, 75, jáne 91 keli salmaqtaǵy boksshylar synǵa túsedi. «Astana Arlans» - «Caciques Venezuela» arasyndaǵy jekpe-jekke qatysatyn boksshylardyń tizimi: 49 keli: Mardan Berikbaev - Ioel Rıvas Fınol 56 keli: Meıirbolat Toıytov - Hose Vısente Dıas 64 keli: Samat Báshenov - Lýıs Martın Arkon 75 keli: Meıirim Nursultanov - Hýan Karlos Rodrıges 91 keli: Vasılıı Levıt - Alfonso Hose Flores Sóz sońynda aıta keteıik, bıyl «Astana arlandarynyń» quramynda da, basshylyǵynda da ózgerister boldy. Klýbqa jańa bapker men jańa boksshylar keldi. «Arlandardyń» qataryna qosylǵan jańa boksshylardyń kópshiligi el birinshiliginiń jeńimpazdary nemese júldegerleri. Olar jańa jobanyń júıesine áli tósele qoımaǵany anyq. Al komandaǵa Marat Jaqıev bas bapker boldy. Sondaı-aq, klýbtyń burynǵy basshysy Bolat Mankenovtiń ornyna belgili boksshy, London olımpıadasynyń chempıony Serik Sápıev keldi.

Endi jańa basshy, jańa quram el senimin aqtaıdy degen úmittemiz.

Búkilálemdik boks serııasynyń 5-maýsymdaǵy kúntizbesi: (WSB - 2015)

2015-01-17 «Astana Arlans» - «Caciques Venezuela» : C1 (49,56,64,75,91) 2015-01-23 «Hussars Poland» - «Astana Arlans» : C2 (52,60,69,81,+91) 2015-01-31 «Azerbaijan Baku Fires» - «Astana Arlans»: C1 (49,56,64,75,91) 2015-02-07 «Astana Arlans» - «USA Knockouts»: C2 (52,60,69,81,+91) 2015-02-14 «Astana Arlans» - «Puerto Rico»: C1 (49,56,64,75,91) 2015-02-21 «Astana Arlans» - «Argentina Condors»: C2 (52,60,69,81,+91) 2015-02-28 «Astana Arlans» - «Italia Thunder»: C1 (49,56,64,75,91) 2015-03-07 «Caciques Venezuela» - «Astana Arlans»: C2 (52,60,69,81,+91) 2015-03-14 «Astana Arlans» - «Hussars Poland»: C1 (49,56,64,75,91) 2015-03-21 «Astana Arlans» - «Azerbaijan Baku Fires»: C2 (52,60,69,81,+91) 2015-03-28 «USA Knockouts» - «Astana Arlans»: C1 (49,56,64,75,91) 2015-04-11 «Puerto Rico» - «Astana Arlans»: C2 (52,60,69,81,+91) 2015-04-18 «Argentina Condors» - «Astana Arlans»: C1 (49,56,64,75,91) 2015-04-25 «Italia Thunder» - «Astana Arlans»: C2 (52,60,69,81,+91) 2015-05-06 Shırek fınal 2015-05-07 Shırek fınal 2015-05-21 Jartylaı fınal 2015-05-22 Jartylaı fınal 2015-06-11 Fınal 2015-06-12 Fınal. Kúnsultan Otarbaı