Boks: Oraldaǵy jarystan keıin Azııa chempıonatyna baratyn jasóspirimder irikteledi
ORAL. KAZINFORM – Oral qalasynda «Jaıyq arena» sport kesheninde 2012 jylǵy jasóspirimder arasynda bokstan Qazaqstan chempıonaty ótip jatyr.
Baıraqty básekege 17 oblystan jáne úsh qaladan 221 jas boksshy keldi. Olar 33-ten 70 kelige deıin 13 salmaq dárejesi boıynsha chempıondyq ataq pen júldeli oryndardy sarapqa salady.
Jarystyń saltanatty ashylý rásiminde BQO dene shynyqtyrý jáne sport basqarmasynyń basshysy Baqdáýlet Sábıtov, 2016 jylǵy Olımpıada chempıony jáne kásipqoı boksshy Danııar Eleýsinov jáne QR bokstan memlekettik jattyqtyrýshysy Aslan Egeýbaev jas sportshylarǵa sáttilik tiledi.
- Bul chempıonattyń Oralda ótýiniń erekshe máni bar. Men ózim osynda 13 jasymda jasóspirimder arasynda top jaryp edim. Alaıda ol kezdegi men qazirgi tańdaǵy boks deńgeıin salystyrýǵa kelmeıdi. Oraldaǵy boks mektebi damý ústinde. Danııal Sábıt bar, jastar arasynda álem chempıony atanǵan Óner Seıilhan bar, jastar ósip keledi, - dedi D.Eleýsinov.
Bokstan Qazaqstan jasóspirimder quramasynyń aǵa jattyqtyrýshysy Jaqsylyq Moldahanov jarys qorytyndysyna sáıkes 1-16 mamyr aralyǵynda Tashkent qalasynda ótetin Azııa chempıonatyna baratyndar irikteletinin atap ótti.
- Osy chempıonattyń ózine jasóspirimder birden kelgen joq. Olar aldymen aýdandyq, oblystyq deńgeıde irikteýden ótti. Sodan keıin soltústik-shyǵys, ońtústik-batys boıynsha eki aımaqtyq chempıonat boldy. Qazaqstan jasóspirimder quramasy jasaqtalǵannan keıin Azııa chempıonaty qarsańynda birneshe oqý-jattyǵý jıyny ótedi. Sondaı-aq boksshylar jarystarǵa qatysady, - dedi J.Moldahanov.
Oraldaǵy Qazaqstan chempıonaty 24 qańtarda máresine jetedi.
Eske sala keteıik, budan buryn Jánibek Álimhanulynyń dopıng daýyna qatysty is qaıta qaralatynyn jazǵan edik.
