Boks: Oralda erler arasynda Qazaqstan chempıonaty márege jetti

ORAL. QazAqparat - Tennıs ortalyǵynda bokstan erler arasynda Qazaqstan chempıonaty márege jetip, barlyq salmaq dárejeleri boıynsha úzdik shyqqandar anyqtaldy, dep habarlaıdy QazAqparat tilshisi.

Sońǵy básekeler barynsha tartysty ótti.

Aqmola oblysynyń ókili Orazbek Asylqulov 57 kg salmaqta qostanaılyq Aıdos Arapovty 3:2 esebimen utyp, chempıon atandy.

60 kg salmaqta qaraǵandylyq Vasılıı Samchýk shyǵysqazaqstandyq Ádilet Qurmetovten aılasyn asyrdy.

Al 63,5 kg salmaqta almatylyq Dilmurat Mijitovtiń mereıi ústem boldy. Ol tartysty jekpe-jekte shymkenttik Abzal Serikti jeńdi - 3:2.

Osy eki salmaqta bıylǵy álem chempıonatyna qatysqan mańǵystaýlyqtar Samatáli men Sanatáli Tóltaevtar jartylaı fınaldan asa almaı, qola júldeni qanaǵat tutty.

67 kg salmaqta jambyldyq Dýlat Bekbaýov Almaty oblysynan kelgen Darhan Dúısebaıdan basym ekendigin kórsetti - 5:0.

71 kg salmaqta shyǵysqazaqstandyq Ermahan Jakpekovtiń baǵy jandy. Ol fınalda pavlodarlyq Qýan Qýatovty qapy qaldyrdy - 4:1.

75 kg salmaqta bıylǵy álem chempıonatynda el namysyn qorǵaǵan atyraýlyq Nurqanat Raıys qatty qarsylyq kórsetken pavlodarlyq Aıatýlla Tákijanovty jeńdi - 3:2.

80 kg salmaqta 2021 jylǵy álem birinshiliginde baq synaǵan elordalyq Nurbek Oralbaı aqtóbelik Jánibek Qartbaevtyń osal jerin tapty - 5:0.

86 kg salmaqta túrkistandyq Saǵyndyq Toǵambaı almatylyq Mádı Ámirovti báseke sońynda nokdaýnǵa jiberdi - 5:0.

92 kg salmaqta taǵy bir elordalyq, bıylǵy álem birinshiliginde rıngke shyqqan Aıbek Oralbaı men áskerıler arasynda álem chempıony, túrkistandyq Abzal Quttybekov qolǵap túıistirdi. Jeńis A.Oralbaıǵa berildi - 4:1.

Asa aýyr salmaqta 2021 jylǵy álem chempıonatyna qatysýshy, túrkistandyq Nurlan Saparbaı men atyraýlyq, 19 jastaǵy Amanat Sabyrǵalı sońǵy básekege shyqty. Munda N.Saparbaıdyń mereıi ústem boldy - 5:0.

Osylaısha Oralda erler arasynda el chempıonaty aıaqtaldy. Bıylǵy birinshilikte birqatar jastar da jarqyraı kórindi. Ásirese, 48 kg salmaqta top jarǵan 18 jastaǵy Sanjar Táshkenbaıdy erekshe ataýǵa bolady.

Eske sala keteıik, budan buryn Qazaqstan chempıonatynda alǵashqy jeńimpazdar anyqtalǵanyn, Danııar Eleýsinovtiń Batys Qazaqstan oblysynyń qurmetti azamaty atanǵanyn jazǵan bolatynbyz.