Boks: Ońtústik Koreıada qazaqstandyq kýrsant «altyn» enshiledi
ASTANA. QazAqparat - Ońtústik Koreıada Áskerı teńiz akademııasynan bilim alyp júrgen Qazaqstan kýrsanty Baqtııar Kúıken Koreıanyń Chındjý qalasynda ótken áýesqoı boksshylar arasyndaǵy jarysta altyn medalǵa ıe boldy, dep habarlaıdy «QazAqparat» HAA tilshisi.
Áýesqoı boksshylar arasyndaǵy respýblıkalyq báseke 2017 jyldyń 14-16 shildesi kúnderi Koreı halyqaralyq qatynastar ýnıversıtetinde ótkizildi.
«Men Áskerı teńiz akademııasy atynan 75 keli salmaqqa deıingi dárejede 20 jáne 30 jas aralyǵyndaǵy boksshylar arasynda óner kórsettim. Jarysty WBA-nyń kásibı boks boıynsha 1974 jylǵy álem chempıony Sý Hýan Hong ashty. Shamamen 500 adam qatysty», - dedi «QazAqparat» tilshisine Chınhe qalasyndaǵy Áskerı teńiz akademııasynyń 4-inshi kýrs kýrsanty B.Kúıken.
«Eki aıqasta 3:0 esebimen jeńiske jettim, bireýi tehnıkalyq nokaýtpen aıaqtaldy, al endi birinde qarsylasym jekpe-jekke shyǵýdan bas tartty», - dedi ol. Onyń aıtýynsha, Koreıada Qazaqstan boksshylaryna qurmetpen qaraıdy.
«Meni fınalda koreılikterdiń maǵan jankúıer bolǵandyǵy tańqaldyrdy. Aqtyq aıqas aldynda meniń rıngke shyǵatyn ýaqytymdy bilip ketti. Olar Qazaqstannan shyqqan kóptegen boksshylardy jaqsy tanıdy. Gennadıı Golovkınniń anasy káris ekenin biletindikten bolar, ony ózderine jaqyn sanap, árqashan jankúıer bolyp júredi», - deıdi qazaqstandyq boksshy. 
