Boks Olımpıada baǵdarlamasynda qalýy múmkin

NUR-SULTAN. QazAqparat - Búgin Halyqaralyq olımpıada komıtetinde atqarý komıtetiniń otyrysy bolyp ótti. Onda áýesqoı boksty Olımpıada baǵdarlamasynda qaldyrý jóninde usynys jasaldy, dep habarlaıdy QazAqparat.

«HOK jáne Halyqaralyq boks assotsıatsııasy arasynda qarjylyq jáne uıymdastyrýshylyq jóninde kelispeýshilik týyndaǵan bolatyn. Soǵan oraı 2018 jyldyń 30 qarashasynda HOK janynan tergeý komıteti jan-jaqty saraptama jasady. Saraptama nátıjesimen áýesqoı boksty 2020 jylǵy Tokıo Olımpıadasy baǵdarlamasynda qaldyrý jóninde usynys jasaldy. Bokstan olımpıadalyq týrnır HOK nusqaýlaryna sáıkes júrgiziledi. Joǵaryda atalǵan sheshimder 2019 jyldyń maýsym aıynda HOK sessııasynda bekitilýi tıis. Soǵan sáıkes 2020 jyly Tokıo Olımpıadasynda bokstan baq synaıtyn sportshylardyń jalpy kvotasy 286 adamdy quraıdy. Halyqaralyq boks assotsıatsııasynyń tolyq mártebesin taný 2020 jylǵy Tokıo olımpıadasynan keıin qaralady», - dep jazdy Halyqaralyq olımpıada komıtetiniń resmı saıty.

Esterińizge sala ketelik, Olımpıada oıyndary 2020 jyldyń 24 shildesi men 9 tamyzy aralyǵynda Japonııa astanasy - Tokıo qalasynda ótkiziledi.