BOKS: Okendo WBA nusqasy boıynsha Groznyıda Chagaevpen álem chempıony ataǵyna talasady
ASTANA. QazAqparat - Amerıkalyq Fres Okendo asa aýyr salmaqta Búkilálemdik boksshylar qaýymdastyǵynyń nusqasy boıynsha álemniń «Turaqty chempıony» ataǵy úshin ózbekstandyq Rýslan Chagaevpen jekpe-jekke shyǵý úshin Groznyıǵa keletin boldy.
Amerıkalyq BAQ-tyń habarlaýynsha, boksshy komandasymen Chıkagodan Polsha astanasy Varshavaǵa ushyp ketken. Sol jerden charterlik reıspen Groznyıǵa barady. Saıys «Ahmat-Arena» stadıonynda 6 shilde kúni ótedi.
Buǵan deıin promýterlermen ózara kelise almaǵandyqtan Okendo saıystan bas tartty degen aqparat taraǵan bolatyn. Sol sebepti 3-4 shildede josparlanǵan baspasóz máslıhaty jáne ashyq jattyǵý jıyny da ótpeıtin bolyp, uıymdastyrýshylar onyń ornyna basqa kandıdat - bosnııalyq Aleksandr Petkovıch, amerıkalyq Shennon Brıggspen kelisimsózder júrgize bastaǵan.
Alaıda, ortaq kelisimge kelgen Okendo aqyry Groznyıǵa baratyn boldy.
Búkilálemdik boksshylar qaýymdastyǵynyń nusqasy boıynsha álemniń «Turaqty chempıony» ataǵyn byltyr kúzde reseılik Aleksandr Povetkınniń ýkraındyq Vladımır Klıchkodan jeńilgeninen keıin bos turǵany belgili. Esterińizge sala keteıik, ol kezdesýde Klıchko álemniń «Sýperchempıony» tıtýlyn qorǵap qalǵan bolatyn.
Aıta ketken jón, Chagaev rıngte 32 ret (20 nokaýt) jeńiske jetken, 2 ret jeńilgen. Al Okendonyń jekpe-jekte 37 jeńisi (24 nokaýt) 7 jeńilisi bar.
