Boks: Mońǵolııadaǵy chempıonatta qandastarymyz 1 kúmis, 4 qola enshiledi
ASTANA. 12 aqpan. QazAqparat - Mońǵol eliniń astanasy Ulanbatyr qalasynda eresekter arasynda bokstyn el chempıonatyn synaltý básekesi bolyp ótti.
Atalmysh jarysqa 28 qurlymnyń (aımaq, qala, kent, jeke sport klýbtary) atynan 206 sportshy qatysyp, erler on salmaq dárejesi boıynsha qolǵap túıistirdi, dep habarlaıdy «Alaman».
Atalmysh jarysqa sol elde turatyn ulty qazaq qandastarymyz da qatysyp, shama sharqynsha nátıje kórsetti. Atap aıtqanda, 52 kelide Nurlan Asqaruly, 60 kelide Beıbit Asqaruly, 64 kelide Bilimbek Qajymuratuly, 69 kelide Erǵan Qýatuly qola júldege qol jetkizdi. Erǵan baýyrymyz buǵan deıin jastar arasynda chempıon atanyp, 2012 jyly Armenııanyń astanasy Erevan qalasynda ótken jastar arasyndaǵy álem birinshiligine mońǵol eli atynan qatysqan bolatyn. Ol álem birinshiliginde áýeli alǵashqy jekpe-jegin erkin ótkizip, keleside joly túıisken japondyq Mınamıno Akıfýmıdy 23:9 esebimen aıqyn basymdyqpen utqan edi. Al úshinshi jekpe-jeginde qazaqstandyq boksshy Aıtjan Shleevpen kezdesip, 13:5 esebimen utyldy.
Sonymen joǵarydaǵy jarystyń eń aýyr salmaǵynda (91+) óner kórsetken Erbolat Tólekuly kúmis júldeni enshiledi. Bul qandasymyz ótken jyly 91 keli salmaqta chempıon atanǵan edi.
