BOKS: Mıgel Kotto Serhıo Martınesti aıqyn basymdyqpen jeńdi
ALMATY. QazAqparat - Jańa ǵana Nıý-Iork qalasyndaǵy (AQSh) Medıson Skver Garden arenasynda úsh salmaq kategorııasy boıynsha álemniń eks-chempıony pýertorıkalyq 33 jastaǵy Mıgel Anhel Kotto WBC nusqaýy boıynsha álem chempıony 39 jastaǵy argentınalyq boksshy Serhıo Martınesti aıqyn basymdyqpen jeńdi.
Sóıtip, Gennadıı Golovkınniń eń yqtımal qarsylasy argentınalyq Serhıo Martınes búgin sensatsııalyq jeńiliske ushyrady. Alǵashqy raýnda-aq Kottonyń basymdyǵy sezildi, ol óte dál jáne aýyr soqqylar berdi. Martınes Kottonyń soqqysynan úsh ret qulady. Kotto toqtaýsyz shabýyldaýmen bolsa, Martınes oqta-tekte qarsy shabýylǵa shyǵyp júrdi.
Saıystyń ekinshi jartysynda Kottyń basymdyǵy aıqyn bola tústi. Al Martınes oıyn tizginin óz qolyna ala almady. Kezinde jaraqat alǵan aıaǵy taǵy da syr bere bastaǵandaı. Toǵyzynshy raýnda Martıneske nokdaýn sanaldy. Toǵyzynshy raýnd pen onynshy raýnd arasyndaǵy úziliste Martınestiń buryshy jekpe-jekti jalǵastyrýdan bas tartty. Osylaısha Mıgel Kotto tehnıkalyq nokaýtpen jeńiske jetti.
Onyń kepildendirilgen tabysy 7 mıllıon AQSh dollaryn qurasa, orta salmaq dárejesindegi WBC nusqasy boıynsha álem chempıony Serhıo Martınestiń kepildendirilgen tabysy 1,5 mıllon AQSh dollaryn qurady. Aıta keteıik, 39 jastaǵy Martınes endi óz karerasyn aıaqtaýy múmkin.
