BOKS: Meıvezer Maıdanaǵa $1,5 mln. tóleýge daıyn
ALMATY. QazAqparat - Álemniń eń úzdik boksshylary reıtınginiń kóshbasshysy Floıd kishi Meıvezer ústimizdegi jyly 13 qyrkúıekte argentınalyq Markos Maıdanamen ekinshi ret jekpe-jekke shyǵýdy josparlap otyr.
Maıdananyń keńesshisi Sebastıan Kontýrsıdiń aıtýyna qaraǵanda, áli kelisim jasalǵan joq, biraq ol týraly 5 kúnnen keıin sheshim qabyldanady. Aldaǵy bolatyn saıysta qolǵapqa qatysty taǵy da qyzyq jaǵdaı týyndaıyn dep otyr. Óıtkeni, esterińizde bolsa, birinshi kezdesýdiń aldynda qolǵaptardy tekserý barysynda Meıvezer Maıdananyń Everlast kompanııasy jasaǵan negizgi qolǵaptaryn «talapqa saı emes» dep jaratpaı tastaǵan edi. Nevada shtatynyń komıssııasy (NSAC) bul tujyrymdy maquldady, biraq Everlast-tyń MX modeldi zapastaǵy jup qolǵabynyń normaǵa saı ekendigi týraly qaýly shyǵardy. Meıvezer bolsa: «Maıdana báribir basqa modeldegi qolǵappen shyǵýy tıis. Eger ol tipti komıssııa maquldaǵan zapastaǵy qolǵappen shyqqan kúnniń ózinde men oǵan qarsy rıngke shyqpaımyn» - dep málim etti. Bul daý Maıdana Everlast-tyń MX emes, Powerlock úlgisindegi qolǵabyn kıip shyǵýǵa kelisim bergen soń ǵana sheshildi. Allboxing.ru saıtynyń habarlaýynsha, ESPN portalynyń aqparat kózinen alǵan málimetine sáıkes, aldaǵy ekinshi kezdesýde Maıdananyń kepildendirilgen syıaqysy 4,2 mıllıon dollardy quraıdy. Bul jerde eń qyzyǵy sol, Maıdana eger óziniń úırenshikti Everlast MX modeli emes, taǵy da Meıvezer maquldaǵan basqa úlgidegi qolǵappen shyǵatyn bolsa, Meıvezer oǵan qosymsha 1,5 mıllıon AQSh dollaryn tóleýge daıyn eken. Birinshi kezdesýde Maıdananyń syıaqysy dál 1,5 mıllıon AQSh dollary bolǵanyn esterińizge salamyz.
